¿Ko llungada katar likel o kham gole chache? ¿Ko mangla letar te llal pala le? ¿Ko dia le e phuvia ta cherda le gazda pe charura? ¿Ko mukla len sargo prajo pe jarniea? ¿Ko ikanda len pe arkoia, sargo char suki?
Gua kai cherela ezgode kastune dela zor gole kai chere ezgode rupune, gua kai ortola e chokanoia gole kai marela po dopo, ta phenena: Lachi si e kolis, ta kafrosarda te na miskolpe.
Soke liem tut katar si e phuvia mai dur, katar e phuvia kai si but dur ikhardem tut, ta phendem chuke: Tu san mo sluga, esvirisardem tut ta ni chudiem tut.
Me cherdem te ave sargo iek trillo, iek trillo nevo, pherdo danda ta lea ka ka nakhe lea pe burdura ta ka drobo len, ta e burdura ka achen sargo prajo.
E chorre ta e dukhade roden e paia, ta ni malaven len, lengi chib sukili trusatar, Me o Del ka asunav len, me o Del katar o Israel ni ka mukav len korkorre.
Aven, phena amenge so si te avelpe, phenen amenge so avilape chak omanglal, ta ka misli amen ande goia ezgoda, o sikaven amenge so ka avel mai angle te sai llana le.
Sikaven amenge sar ka avelpe mapalal, ta sai llana kai tumen sen dela, te llana kai cheren o lachipe, o o bilachipe, te sai avel amen so te phena, ta te chudiamen.
Vazdiam iekhe katar o norte, ta ka avel, ka molilpe mange katar likel o kham, ta ka ustavel e gazden tala pe porrne sargo glibo kai ustavel gua kai radil e chik.
¿Ko phenda le omanglal, te sai llana, o ko phenda le mai anglal te phena kai si chachipe? chachimaia niko ni phenda le ta niko ni sikada, ta niko ni asunda tumare alava.