Ku TUHAN bejaku, “Tu nembiak Aku, ke diberi Aku pengering, ti udah dipilih Aku, sereta dikerinduka Aku. Aku udah ngisi iya enggau Roh Aku, lalu iya deka mai atur ti lurus ngagai genap bengkah bansa.
Iya deka mengkang andal ati sereta enda lemi semengat. Iya deka numbuhka atur ti lurus di dunya tu. Menua ti ba tebing tasik deka gagit ati nganti ajar ari iya.”
TUHAN Allah Taala ngaga lalu mintarka langit. Iya nempa dunya, enggau semua utai ti idup dia. Iya meri pengidup enggau seput ngagai semua mensia di dunya tu. Lalu diatu TUHAN Allah Taala bejaku ngagai nembiak Iya,
“Aku ti TUHAN udah ngangauka nuan lalu meri nuan kuasa nentuka atur ti lurus dipejalaika di dunya. Ulih nuan, Aku deka ngaga siti sempekat enggau semua mensia. Ulih nuan, Aku deka mai penampak ngagai semua bansa.
“Semina Aku aja ti TUHAN Allah Taala nuan. Nadai petara bukai tau enggau bempu mulia Aku. Aku enggai nejuka engkeramba bempu puji ti patut diberi ngagai Aku.
Nyanyi lagu ti baru ke TUHAN. Belagu muji Iya, semua dunya! Puji meh Iya, kita ke belayar di tasik. Puji meh Iya, semua utai ti idup di tasik! Belagu meh kita menua ti ba tebing tasik, enggau semua orang ke diau dia!
Awakka menua puang enggau nengeri ti dalam menua puang, muji Allah Taala. Awakka orang di Kedar muji Iya! Awakka sida ke diau di nengeri Sela manjung enggau ati ti gaga ari tuchung bukit!
Ku Allah Taala bejaku, “Aku lama udah enda bemunyi. Aku nadai nyaut bala nembiak Aku. Tang diatu maya udah datai alai Aku deka ngereja utai. Aku rauh-rauh munyi indu ke radai deka beranak.
“Aku deka nguluka bala nembiak Aku ke buta bejalai nengah jalai raya ti nadai kala ditengah sida. Aku deka ngubah pemetang sida nyadi penampak lalu ngerataka menua ti belenggak-lenggung di mua sida. Tu meh semaya Aku, lalu Aku deka ngamatka semua semaya nya.
Tang diatu bala nembiak Iya udah kena rumpak. Sida iya ditutup dalam bilik ti nadai jenila lalu dilalaika dalam rumah jil. Reta tengkira sida udah dichuri sereta dirumpak, lalu nadai orang datai ngelepaska sida.
Nya alai Iya ngasuh kitai ngasaika pengeringat Iya lalu natka pemerinsa laban perang. Pengeringat Iya baka api ti nunu semua menua Israel, tang kitai nadai nemu utai ti nyadi. Kitai nadai belajar ari utai nya.