Lee ihiẹn Chuku wụ Osolobuẹ ku — Chuku hụn ke igwere ile, gbama wẹ; hụn gbama elu-ụwa lẹ ihiẹn ile a gha imẹ ẹ a pụha, Chuku hụn e ye ndị rị elu-ụwa uzun, e ye ndị ile rịn'a ndụn:
ọ sị, “Mmẹ wụ Osolobuẹ kpọ ị ọkpụkpọnị furuni; m k'e kwọndọn i ẹka. M k'e dọnmẹ i, gi i họnrin onyẹ hụn mmẹ lẹ ndịnị gha ẹka a e mẹgbama, mẹ i wụrụzịkwọ ukpẹ ndị alị ọzọ
Bụnị nị Osolobuẹ ẹbụ ọhụn, gi ni ẹbụ ja a mma ebe ile ụwa ru — kẹ ụnụ ile a gha ohimin kẹ ihiẹn ile rị imẹ ẹ, kẹ alị ndị teni rị mkpẹnrẹn ohimin lẹ ndị ile bi imẹ wẹ.
O k'a sị, “Agbabiegụọ m nkịtịn, e kpumẹgụọ m ọnụ ọda-ọda, kwọndọnchanrịn enwẹn m. M jẹnkọ nwan d'e yi oro kẹ okpoho rị a mụ nwa, m yi, a lụ m, a sụn m udẹn.
M k'e du ndị ẹnya-ishi — dughadẹ wẹ ụzọ wẹ marịnlẹni, m k'e we wẹ gha ozue wẹ marịnlẹni. M k'e mẹ ishi họnrin ukpẹ ebe wẹ ghakọ, mẹ ebe mẹ mkpọke-mkpọke riẹnni wẹ. M k'e mẹ ihiẹn ndịnị; agbakịtọkọ m ndị nke m azụụn.
Ya ọ nọ gi eje-olulu ẹ sọn wẹ, gi agha lẹ ogbugbu lẹ ntikpọ rịn'a sọn wẹ; agha nọ kpumẹ wẹ lekẹ ọkụn rị e nwunni — aghọtakwọnị wẹ; agha e bu wẹ ri kẹ ọkụn, egizikwọnị w'a dọn.