Mwaei ko u noto Kamuktaindet Jehovah, ne kitoi koyai kipsengwetisiek, ak koiito; inendet ne kiito ng’onyuni, ak che mong’une oloto; inendet ne igochin kabuset bik che menyei ng’ony, ak kogochi tamirmiriet ichek che bendote:
Otienji Jehovah tiendo ne leel, otien kalosunenennyi koboch tabandab ng’ony; okwek che ochortoige nyanjet, ak tugul che mi orit, ngegusiek, ak bik che menyei oloto.
Ak amutune kipkoratinik oret ne manaei; andochini eng’ ortinwek che manaei: awale mesundeito koek lapkeiyet eng’ tainywa, ak alitit komoswek che kunuren. Ayae tuguchuto, amabagaktoi.
Ng’o ne korat, kobate otwogindennyu? Anan ng’o ne ming’at ko u nenyu ne kiyoktoi ne ayoktoi? Ng’o ne korat ko u inendet ne kiting’ege kalyet, ak ko korat ko u otwogindetab Jehovah?
Ago chu ko bik che kigiluul, ak kerebe tugukwak; kiginame ichek tugul keringonik, ak keung’e korgorosiek: kigoek che kiluulei, ama mi chi ne soru; kigoek che kiluule tuguk, ama mi chi ne len, Oweekte.
Kiigoito ng’o Jakobo keluul, ak kiigoito ng’o Israel kogochi rebik? Tos ma Jehovah? Inendet ne kigiyachi achek tengekto, ak ne kima cham ichek kobendate ortinwekyik, ama kas it ng’atutiennyi.