Dis na mi wokman we a de sɔpɔt, di wan we a dɔn pik, we mi sol de gladi fɔ; A dɔn put mi Spirit pan am, i go mek ɔl mɔtalman na wɔl trit in kɔmpin di sem.
gras we de na watasay we dɔn wik, sɛf i nɔ go brok, wik we de bɔn lo wan na lamp, sɛf i nɔ go ɔt; i go waka tret wit PAPA GƆD fɔ mek ɔlman trit in kɔmpin di sem.
Na dis PAPA GƆD se, PAPA GƆD, we mek di skay ɛn opin am wayd wan, we mek di wɔl ɛn ɔl wetin de de; we gi layf to di pipul dɛn we tap de ɛn spirit to di wan dɛn we de waka de:
Na mi na PAPA GƆD, A dɔn kɔl una fɔ waka tret na mi yay, A dɔn ol una an ɛn kip una; A dɔn gi una as Kɔvinant to di pipul dɛm, ɛn layt to di neshɔn dɛm,
Lɛ di ɛmti ples we pipul nɔ go ebul tap ɛn in siti dɛn, siŋ lawd lawd wan, Di vilej dɛn we Keda tap; ɛn lɛ di wan dɛn we tap na Sela siŋ wit gladi Lɛ dɛn ala pantap di mawnten dɛn.
PAPA GƆD de go lɛk pawaful man, i de bigin in bad bad vɛksteshɔn lɛk sojaman; I de ala, I de ala lawd wan, i de sho insɛf pawaful wan agens in ɛnimi dɛn.
Ɛn a go pas dɛn blɛn yay na rod we dɛn nɔ no A go gayd dɛm na rod we dɛn nɔ no wande. A go tɔn di daknɛs we de bifo dɛm to layt, ɛn mek di rɔf ples dɛn to lɛbul grɔn. Na dɛn tin ya a go du, ɛn a nɔ go tɔn mi bak pan dɛm.
Bɔt dɛn wan ya na pipul dɛn we dɛn dɔn tif ɛn kɛr ɔl dɛn tin dɛn go, dɛn trap dɛn ɔl na ol dɛn ɛn ayd dɛn na jel; dɛn dɔn tɔn lɛk tin fɔ kech ɛn it, ɛn nɔbɔdi nɔ de fɔ sev dɛn, dɛn dɔn tɔn tin fɔ tif we nɔbɔdi nɔ de fɔ se, “put am bak!”
Udat bin gi Jekɔb to di wan dɛn we de pwɛl, ɛn Izrɛl to di wan dɛn we de tif? Nɔto PAPA GƆD, we wi sin agens, di wan we dɛn nɔ gri waka nain rod, di wan we dɛn nɔ gri obe in lɔ?