×

Ika Bible 2018

Azaya 43

1
Ka lee nwan ihiẹn Osolobuẹ ku — Osolobuẹ hụn ke ịyụ wụ Jekọpụ, Osolobuẹ hụn kpụ ịyụ wụ Izrẹlụ: “Atụlẹ egun, a gbarịgụọ m'ị; a kpọgụọ m'ị ẹfan, họrị ị; nke m kẹ ị wụ.
2
Ị ghakọnị imẹ mirin, m k'a nọyeni i; ị ghakọnị imẹ iyi, erukpumekọ wẹ i; ị ghakọnị imẹ ọkụn, ọkụn erẹnkọ ị — y'a dụnkọ ọkụn,
3
makẹni mmẹ wụ Osolobuẹ, hụn wụ Chuku ụnụ, Onyẹ-nsọ Izrẹlụ, Onyẹ Azụọpụhanị ụnụ; mmẹ gi Ijiptu gbarị isi ụnụ, gizikwọ Ẹtiopịa lẹ Sẹba gbarị ụnụ.
4
Ebe o mẹni ị rị m mkpa lẹni m'a ra gi i gu egu, lẹzini ihiẹn i sụọ m a sụọ, m k'e gi ịhịan gbarị isi i, m k'e gi ndị alị ọzọ gbarị isi i.
5
Atụlẹ egun, mmẹ lẹ yụ wị; m k'a gha ẹbamịn ọwụwa-ẹnyanwụn welụa ụmụ ị, m k'a ghazị ẹbamịn ọdịdan-ẹnyanwụn welụa ụnụ.
6
M k'a sịzịkwọ ẹbamịn ọwụwa-ẹnyanwụn, ‘Hapụ wẹ nị wẹ la!’ sị ndịdan-mirin, ‘Egbọndọnkwọlẹ wẹ!’ Welụa nị ụmụ m ikẹnnyẹ rị ebe teni, lẹ ụmụ m ikpoho rị ebe ụwa ru —
7
ndị ile wẹ gi ẹfan m marịn, ndị ile hụn m ke nị m gi nwọnrin ọghọ, ndị ile m mẹmẹ.”
8
Dupụha nị ndịnị nwọn ẹnya bụ w'a ra legha ụzọ, hụn nwọn ntịn bụ w'a ra nụ ihiẹn.
9
Alị ile rị ichẹn-ichẹn wẹ zu, ndị ichẹn-ichẹn wẹ zugbama. Elee hụn imẹ wẹ kutu ẹ nị ihiẹnni jẹnkọ d'e mẹ, mọbụ gwatọ ẹnyi ihiẹn ndị hụn mẹ mbụ? Wẹ kpọ ndị ọshẹri wẹ nị wẹ ghọsị nị e kughọ w'a — kẹni onyẹ nụ, o kweri ni ezioku rọ.
10
Osolobuẹ sị, “Ụnụ wụ ọshẹri m, odibo m hụn m họrị n'ọ marịn m, kweri oku m, ghọtazịkwọ nị mmẹ rọ. Onwọnni mmọn buni m ụzọ, onwọnzikwọnị hụn k'a nọkin ẹnya m.
11
Mmẹ wụ Osolobuẹ, mmẹ lẹ enwẹn m, wezụka m, onyẹ-nzụọpụha ọzọ arịa.
12
Mmẹ ku ẹ, mmẹ zụọpụha, mmẹ hị a — mmẹ, ẹlẹ mmọn ụnụ gha alị ọzọ buhẹ. Ụnụ wụ ọshẹri m nị mmẹ wụ Chuku. Ya kẹ mmẹ wụ Osolobuẹ ku.
13
Mmẹ rọ, gha alị lala. M kwọndọn ihiẹn, onwọnni onyẹ k'a saẹka napụ m'a. M mẹ ihiẹn, onyẹ k'a s'ẹka gbehutọ a?”
14
Lee ihiẹn Osolobuẹ ku — Osolobuẹ Onyẹ-mgbapụha ụnụ, Onyẹ-nsọ Izrẹlụ: “M k'e gi ufiri ụnụ zi ndị-agha jẹn Babilọnụ, mẹ ndị Babilọnụ gi ụgbọ-mirin ndị ahụn wẹ gi a nyan isi gbapụ.
15
Mmẹ wụ Osolobuẹ, Onyẹ-nsọ ụnụ, Onyẹ hụn ke Izrẹlụ, Onyẹ hụn wụ Eze ụnụ.”
16
Lee ihiẹn Osolobuẹ ku — Osolobuẹ hụn be ụzọ ye imẹ ohimin, hụn be ụzọ ye imẹ okẹn-mirin ahụn;
17
Osolobuẹ hụn mẹ ụgbọ-ẹshin lẹ ẹshin ndị ahụn chụrụ wẹ, hụn mẹ ndị-agha hụ lẹ ndị ile wẹ gi dọn ẹnya chụrụ wẹ, hụn bu wẹ gbama alị imẹ okẹn-ohimin ahụn, elihikọzị wẹ — wẹ nọ tinyụn, tinyụnchanrịn kẹ ukpẹ-ẹka —
18
Osolobuẹ hụn mẹ ihiẹn ndị ahụn ile sị ụnụ: “Anyanhanzịlẹ ni ihiẹn akan; atọlẹ ni e ro ihiẹn mẹ ụnụ mbụ.
19
Lee n'ẹ, m rị e mẹ ihiẹn ọhụn! O mẹmẹgụọdẹ nwan! Ụnụ a rị a hụn a? M rị a kwaye ụzọ imẹ atụ, e mẹ iyi a pụhasọnmẹ imẹ alị ọkpọ-nkụn.
20
Anụ-ọfịa e yedẹ m ọghọ — kẹ nkitẹ-ọfịa wụ jakalụ kẹ ozuzu-uku, makẹni m'e mẹ mirin a rị imẹ alị ọkpọ-nkụn, e mẹ iyi a pụhasọnmẹ alị te kpọchanrịn nkụn, hụn m gi e ye ndị nke m mirin, ndị m họrị,
21
ndị nke m hụn m mẹmẹni enwẹn m — kẹni wẹ ku ọrụn ọma m rụn.
22
Kanị, ịyụ wụ Jekọpụ eke kpọkukwọ m nwan; ndụn m a gụgụọ ị, Izrẹlụ!
23
Y'e wẹhẹni atụnrụn gi chụnyeni m ẹjan w'a kpọ ọkụn mọbụ chụnyesọnmẹni m ẹjan gi ye m ọghọ. Asịnị m'ị ye m oyiye-ọka, nkẹ ọ wụrụ nị m buye i ibu; egini m oku ịmụyeni m nsẹnsi mẹ ndụn gụ ị.
24
Y'e wẹhẹnini m kalamusu e kun fuẹin mọbụ buhẹni m ụtọrọ anụ bu ọda wẹ gi chụn ẹjan. Kama, ị hụ e gi njọ ị e buye m ibu, e gi mmẹfie i e mẹ ndụn a gụ m.
25
Mmẹ rị e finchanpụ mmẹfie ụnụ, mmẹ lẹ enwẹn m; makẹ ufiri mmẹ lẹ enwẹn m, anyanhankọzị m njọ ọnụ.
26
Gbanị nị m ihiẹn ndị mẹ mbụ, nị ẹnyi dọ nị okuni ru alị; kin ni nwan nị ẹnyi lee kẹ ẹka ụnụ dọn rị ọchan.
27
Nẹdi ibuzọ ụnụ e mẹghọ njọ; ndị e kuni ụnụ a paghọ oku m.
28
M jẹnkọ nwan d'a fa ndị okẹn ịhịan rị imẹ Ụlọ-nsọ ụnụ, m k'e gi Jekọpụ họnrin ihiẹn wẹ k'e tikpọ, ẹghẹẹ, e we m Izrẹlụ ye wẹ kpari.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes