Lee ihiẹn Osolobuẹ ku — Osolobuẹ hụn ken'i, hụn mẹmẹ i imẹ ẹfọ nnẹ i, hụn jẹnkọ d'e yen'i ẹka — ọ sị, “Odibo m Jekọpụ, atụlẹ egun. Jẹshurunu hụn m họrị, atụlẹ egun.
Onyẹ nọ nwan kẹ mmẹ? Ya ku. Ya ku; ya ghọsị m'a — ya ku k'o dọn mẹ ihiẹn ile mẹni kete m tumẹlẹ ndị nke m; ya kuzikwọ ihiẹn rị ihun, ẹghẹẹ, ya kuzikwọ lalanị.
Amalẹ ni piripiri, ndị nke m; atụlẹ ni egun. Agwatọgụọnị m ụnụ kete-kete nị ihiẹn ndịnị jẹnkọ d'e mẹ? Ụnụ wụ ọshẹri m! Gwa nị m nwan kẹ o nwọn Chuku rịnị wezụka m! Mba! Ọmụma ọzọ arịa — amarịn m ọzọ!”
Ịya lẹ ndị nọ kẹ ya k'a fakwọ! Ndị omẹ-nka hụn a kpụ mmọn wụhụ ịhịan mmaka. Wẹ ile wẹ pụhachanrịn d'e kin nwan; wẹ k'e wetu wẹ alị — egun a tụgbu wẹ, ifẹnrẹn e mẹgbu wẹ.
Ọkpụ-ụzụn weri ihiẹn o gi a kpụ ụzụn, o mẹ ẹ k'o mẹ ẹ imẹ ọkụn — o gi otutu-ụzụn a kụ a n'ọ rị k'ọ chọ; ẹka a zeni k'o gi a kụ a; ẹgụn gụnma a, ndụn a gụ a; omẹni ọ ranị mirin, ẹhụ a rọ a.
Ọpịn-osisi mapụha hụn ọ chọ imẹ osisi, o gi pẹnsụlụ kayesọnmẹ ẹ isini lẹ isini; o gi izẹ o gi a tụ osisi tụsọnmẹ ẹ k'o dọn chọ; o gi ihiẹn a kayesọnmẹ ebe ọ chọ n'ọ tụ. Ọ tụ a n'o yi ịhịan — yi ẹ, yichanrịn a; o bu ẹ che ụlọ-mmọn.
Ịya kẹ ịhịan gi a fiye ọkụn: o weri hụn o gi a fiye ọkụn a nyan, o weri hụn o gi e shi ihiẹn-oriri — kanị o gizikwọ osisi hụ tụ mmọn, e fe ẹ, o gi ẹ pịnrịn nwa-mmọn, a kpọn'a isi-alị.
Ẹghẹẹ, o gi azụụn ohu họnrin nkụn o gi ẹ shi ihiẹn-oriri, o gi ẹ hụnma anụ, ri, rijun ẹfọ. O gizi ẹ a nyan ọkụn, a sị, “Ẹhẹn, ẹhụ e kpọn m ọkụn! Ọkụnnị arịka mma.”
Hụnyẹ rịhụ e ri ntụn! Uche ẹ hụn gbayịyagụnị e dufiegụọ a. Ọ sakọ ẹka zụọpụha enwẹn ẹ mọbụ sị enwẹn ẹ, “Ẹlẹ ihiẹn nwọnlẹni isi kẹ m kwọndọn ẹka-nni m ihiẹnni?”
Lee ihiẹn Osolobuẹ ku — ihiẹn Onyẹ hụn gbapụhan'ị ku, Onyẹ hụn mẹmẹ i imẹ ẹfọ-nnẹ i: ọ sị: “Mmẹ wụ Osolobuẹ hụn ke ihiẹn ile; mmẹ sụọ setịnpụ igwere; gi ẹka m gbama ụwa kẹ ẹkwa.
Mmẹ haịn ndị-amụma ntụ gi e ku ọzọ, ọzọ e mẹ, e mẹ ndị a hụn-ụzọ a nọ kẹ ndị ẹwobi; mmẹ haịn o gi arụnahịn ndị marịn ihiẹn, ihiẹn wẹ marịn e họnrin ihiẹn nwọnlẹni isi.
Mmẹ ku oku Saịrọsị, sị, ‘Ịya wụ onyẹ e duni m anụ. O k'e mẹkwama uche m’; o k'a sị wẹ, ‘Tụndọnzi ni Jerusalẹm’, sị wẹ, ‘Gbedọnzi ni iyetọ Ụlọ-NSỌ Osolobuẹ.’ ”