×

Bukuit Ne Tilil 2020

ISAIA 44

1
Kas anyun nguno, ee otwogindennyu Jakobo; ak Israel ne kialewen:
2
Mwaei Jehovah ne kiyain, ne kimimiin eng’ moet, ne toretin, ko u ni kole, Ameiywei, ee otwogindennyu Jakobo; ak inye Jesurun, ne kialewen.
3
Amu arong’jini beek ne amei melel, arong’jini ainosiek emet ne yaamat: arong’jini Tamirmiriennyu iyoteng’ung’, ak arong’jini berurtanyu lagoguk:
4
ak kobityo eng’ ole mi suswek, ko u ketik che bitos eng’ ole roote beek.
5
Mwaei age kole, A bo Jehovah; ak koguuregei age kainetab Jakobo; ak kosirji age eunnyi kainetab Jehovah; ak komwaitoegei kainetab Israel.
6
Mwaei Jehovah, Laitoriatab Israel, ak ko katiagindennyi Jehovah ne bo lugosiek, ko u ni kole, A ne bo tai ak ne bo let; ama mi Kamuktaindet age kobatena.
7
Ak ng’o ne u ane, ne kuurei, ak komwaita, ak kotetwa, koboch ngab ande bikab keny? Ak ingomwa ichek tuguk che bwanei, ak che ta kosuldoi.
8
Amoiywei, anan oarogense: tos ma amwaun nito keny, aborun? O baorinikyuk. Tos mi Kamuktaindet age kobatena? Ee, mamitei Ruandet; mangen age.
9
Buch icheget tugul che yaei kanamonik che kiwaei; ak matinyei keljinet tugukwak che iboiboegei: ak mageertoi baorinikwak, ama naei; si kolilanso.
10
Ng’o ne kiyai cheptalelit, anan kotany kanamwet ne kiwaei, ne tinyei keljinet ne bo buch?
11
Ogeero, ililandos choronokyik tugul; ak bo bik musogik: ingoyumgei tugul, ingotononso; iyweisiei, ilandos tugul.
12
Itanyi kitang’indet aiywet, ak koboisie nesek, ak kotang’e kiriswet, ak koboisie eunnyi ne kim: ee, amei rubet, ak betei kimnatennyi; maeei beek, ak kotanui.
13
Iitoe musogindetab baoinik borowet; ak komare kalamit; site rotok, ak komare yiemutiet karik che kimarse, ak kowai koigei itondab chito, ko u kororonindab chito, si kobiit kotebe go.
14
Iluuljingei taragonik, ak koib biribiriet ak ketit age, ak koripchigei age eng’ ketikab osnet: minei tarakwet ne sabul, ak koner amu ropta.
15
Egu anyun ketoto ne ilaali chito; ak ibei kwenikyik, ak kwo koyu; ee, ilaali, ak kobeele makatinik: ee, yaei cheptalelit, ak kosa; yaei koek kanamwet ne kiwaei, ak kogutung’ji.
16
Ilaali alak; amei alak banyek: watani bendo, ak kobiyo: ee, yue mat, ak kole, Haa, kalalang’itu, kaageer mat:
17
ak koyae che ng’etu cheptalelit, noto kanamwennyi ne kiwaei: ibutyin ak kogutung’jin, ak kosaei, kole, Sorua; amu i cheptalelinnyu.
18
Maingen ichek, amaibwati: amu kigoger konyekwak, si mageerto; ak koger mugulelwekwak, si maiguiyo.
19
Ama mi ne ibwati, ama mi naet anan kaguiyet ne mwaei kole, Kaabeel alak eng’ ma: ee, kaabeele makatinik nesekyik kogeny; kaawatane banyek ak aam: ak tos ayai ne kang’et koek kit ne kiwechei? Tos abutyini kit ne kiyae ketit?
20
Amei orek: kagomaas inendet muguleldo ne iberberat, kot ko maimuchi kosor sobondanyi, anan komwa kole, Tos mami lembeita eunnyu ne bo tai?
21
Ibwat tuguchuto, ee Jakobo, ak Israel; amu i otwogindennyu: kiayain; i otwogindennyu: ee Israel, mautienen.
22
Kiaiste bistaosieguk, ko u boldet ne o, ak kiaiste tengekwogiguk, ko u boldet: weekyage; amu kiatiachin.
23
Ee okwek kipsengwetisiek, Otiense, amu kiyai Jehovah noto; owaach okwek, komoswek che bo orit che bo ng’ony; otiense, okwek tulonok, ee osnet, ak ketit age tugul ne mi yoto: amu kagotiach Jehovah Jakobo, ak kotororgei eng’ Israel.
24
Mwaei Jehovah, katiagindeng’ung’, inendet ne kimimiin eng’ moet, ko u ni kole, A Jehovah, ne yaei tuguk tugul; anege ne aiitoi kipsengwetisiek; ne aiitoi ng’ony; ng’o ne mi kobota?
25
Ne walei kaborunoikab kiplembechonik koek buch, ak kogochin che ng’orsei koiiywenso; ne weechi bik che ng’omen koba let, ak koyaei naenywa koek berberindo:
26
ne igimiti ng’olyotab otwogindennyi, ak kosuldoi kiruogetab chechik che kiyoktoi; ne mwaei agobo Jerusalem kole, Tun kimenyei; ak komwaei agobo nganasokab Juda kole, Tun kiteechei, ak ang’eet komoswekyik che kigoek karatwek:
27
ne mwachin riret kolenjin, Yaam, ak atenyi ainosieguk:
28
ne mwaei agobo Kirus kole, Inendet ko mestowondennyu, ak koyaei inendet tuguk tugul che achame: mwaei kogeny agobo Jerusalem kole, Tun kiteechei, ak komwachin hekalut kolenjin, Tun kilumei lumeiyweguk.
Kalenjin Bible 2020
God's word open for all Bible Society of Kenya, 2020
:
Save Notes