Svo segir Drottinn við sinn smurða, Kýrus, sem ég hef tekið í hægri höndina á til að leggja undir hann þjóðir, ræna konunga vopnum til að opna hlið fyrir honum svo að borgarhlið verði ekki lokuð.
Drjúpið þér, himnar, að ofan, skýin láti réttlæti niður streyma, jörðin opnist og láti heill spretta fram og réttlætið blómgast. Ég er Drottinn sem skapar þetta.
Vei þeim sem deilir við skapara sinn, þeim sem er leirbrot innan um önnur leirbrot jarðar. Getur leirinn spurt þann sem mótar hann: „Hvað ert þú að gera?“ eða verk hans sagt: „Hann hefur engar hendur.“
Ég vakti hann í réttlæti og geri brautir hans beinar. Hann mun endurreisa borg mína og láta útlaga mína lausa án lausnargjalds eða gjafa, segir Drottinn allsherjar.
Svo segir Drottinn: Auður Egyptalands og gróði Kúss og hinir hávöxnu Sabear munu koma til þín og verða þín eign. Þeir munu fylgja þér í fjötrum og falla fram fyrir þér og játa: „Hjá þér einum er Guð og enginn annar er til, enginn annar Guð.“
Já, svo segir Drottinn, skapari himinsins, hann einn er Guð, hann mótaði jörðina og bjó hana til, hann grundvallaði hana, hann skapaði hana ekki sem auðn heldur gerði hana byggilega: Ég er Drottinn og enginn annar er til.
Ég hef ekki talað í leynum, ekki einhvers staðar í myrku landi, ég hef ekki sagt við niðja Jakobs: „Leitið mín í tóminu.“ Ég er Drottinn og segi það sem satt er, skýri frá því sem rétt er.
Safnist saman og komið, gangið nær, þér sem komust undan af þjóðunum. Þér sem burðist með trémyndir skiljið ekkert, tilbiðjið guð sem getur ekki hjálpað.
Gerið kunnugt og leggið það fyrir, já, ráðgist hver við annan: Hver boðaði þetta frá öndverðu, skýrði frá því fyrir löngu? Var það ekki ég, Drottinn? Því að enginn er Guð nema ég, réttlátur Guð og frelsari er enginn nema ég.
Ég hef svarið við sjálfan mig: Af munni mínum er sannleikur út genginn, orð sem ekki snýr aftur. Fyrir mér skal sérhvert kné beygja sig og sérhver tunga sverja við mig.