×

Ika Bible 2018

Azaya 45

1
Ọnwan kẹ mmẹ wụ Osolobuẹ rị a gwa onyẹ hụn m tumẹ, Saịrọsị, onyẹ hụn m kwọndọn ẹka-nni — n'o mẹrisọnmẹ alị ichẹn-ichẹn, kị wẹ, n'ọ gbụpụsọnmẹ ndị-nze ẹwuru-agha wẹ gi e che ẹhụ lẹni m gụnpụsọnmẹn'ẹ ọnụmụzọ, nke wụnị onwọnni ọnụ-mgbọn k'a gụnrụnn'a. M rị a sị a,
2
“M jẹnkọ d'e burun'i ụzọ — e nukpọpụsọnmẹ m ugu ichẹn-ichẹn; m k'e tikpọpụsọnmẹdẹ ọnụ-mgbọn ndị wẹ gi igwe-bronzu rụn, a jakịkasọnmẹ m igwe ile wẹ gi fidọn ọnụ-mgbọn ichẹn-ichẹn.
3
M k'e ye i akụ-lẹ-ụba rịdẹ imẹ ishi, akụ-lẹ-ụba rịsọnmẹ ebe zuerini, y'e gi ẹ marịn nị mmẹ wụ Osolobuẹ, Chuku ndị Izrẹlụ, onyẹ hụn kpọ ị ẹfan tumẹ i.
4
Ufiri odibo m hụn wụ ebọn Jekọpụ — ufiri Izrẹlụ hụn m họrị, m rị nwan a kpọ ị ẹfan e tumẹ; m rịzịkwọ e ye i nzere — ọsụọn'a nị y'a marịn m.
5
Mmẹ sụọ wụ Osolobuẹ — Osolobuẹ ọzọ arịa. Chuku ọzọ arịa wezụka mmẹ. M k'e ye i ikẹn — ọsụọn'a nị y'a marịn m —
6
kẹni ụwa ile marịn m, kẹ ndị rị ẹbamịn ọwụwa-ẹnyanwụn kẹ ndị rị ọdịdan-ẹnyanwụn; a marịn wẹ nị onyẹ ọzọ arịa wezụka m. Mmẹ sụọ wụ Osolobuẹ, ọzọ arịa.
7
Mmẹ ke ukpẹ, kezikwọ ọhịhị; m'e ye ihiẹn rị mma, e yezikwọ nsọngbu; mmẹ wụ Osolobuẹ e mẹchanrịn wẹ ile.
8
“Elu-igwere, ihiẹn furuni ya gha imẹ i zuetu! Ya gha orukpu-igwere zue kẹ mirin! Alị ya shịapụzịkwọ ọnụ ra a — nzụọpụha ya gi ẹ pupụha, ezi-omumẹ ya gizikwọ a suepụha. Mmẹ wụ Osolobuẹ e mẹgụ a rị ẹrịra.
9
“Nsọngbu rị e che onyẹ ya lẹ onyẹ ken'ẹ rị e kpe, mpekele-ite mmaka rị alị kẹ ibe ẹ. Ụrụa a jụdẹ nwan ọkpụ-ite, ‘K'ị rịdẹ nwan e gi m a kpụ’ ra ihiẹn wẹ rị a kpụ a sịdẹ, ‘Ihiẹn ị rị a kpụ enwọnkwọ ẹka’?!
10
Nsọngbu rị e che onyẹ sị nẹdi ẹ, ‘K'ị rịdẹ nwan a mụ ihiẹnni?’ mọbụ jụma nnẹ mụn'a, ‘Kịnị k'i rịdẹ a mụ ihiẹnni?’
11
Lee ihiẹn Osolobuẹ ku, Osolobuẹ, Onyẹ-nsọ Izrẹlụ lẹ onyẹ hụn ken'ẹ, ọ sị: ‘N'i gidẹ nwan oku ihiẹn lalanị jụma m njụ banyeni ụmụ m, ra n'ị gwamadẹ m ihiẹn m k'e gi ihiẹn m ke mẹ?
12
Mmẹ ke ụwa, mmẹ ke ịhịan butọ elu ẹ; mmẹ gi ẹka m shịshịapụ igwere, kịpụha ihiẹn ile rịn'a che ebe wẹ rịsọnmẹ nwan.
13
Mmẹ kpọli Saịrọsị — makẹni m'e mẹ ihiẹn furuni; m k'e mẹ ihiẹn ile o buche ẹka ghan'a. O k'a tụndọnzi obodo m wụ Jerusalẹm, mẹ wẹ hatu ndị nke m wẹ nwụnshi alị ndị ọzọ. Ẹlẹ nị wẹ kụ a ụgwọ mọbụ ye ẹ ihiẹn. Ya kẹ Osolobuẹ ku.’ ”
14
“Osolobuẹ sị: Ndị Ijiptu lẹ ihiẹn wẹ rụn lẹ ndị Ẹtiopịa lẹ ibu-afịa wẹ lẹ ndị alị Sabia — ndị ahụn sue usue, k'e fetu, buruhẹ ụnụ, wụrụ nke ụnụ; wẹ k'e sọnlụa ụnụ, wẹ lẹ ẹgan wẹ kpọma wẹ. Wẹ k'e hulụanị ụnụ isi, a rịọ ụnụ, a sị, ‘Osolobuẹ nọyeni ụnụ anọyeni, onwọnni onyẹ ọzọ ọ wụ; Chuku ọzọ arịa.’ ”
15
Ezioku-ezioku, Chuku hụn e zuemẹ enwẹn ẹ k'ị wụ, Chuku Izrẹlụ, hụn a zụọpụhanị!
16
Ifẹnrẹn lẹ ịfa k'a rịnị ndị ile a pịn mmọn; uwẹ ile k'a fa.
17
Kanị Osolobuẹ k'a zụọpụha ndị Izrẹlụ, nzụọpụha hụn k'a rị jẹnrin ejẹn; d'e ru ọgụgụ ogẹn ụnụ afakọ, o kpuyekọ ụnụ!
18
Makẹni ọnwan kẹ Osolobuẹ ku — Osolobuẹ, onyẹ hụn ke igwere; ịya wụ Chuku hụn ke ụwa, mẹmẹ ẹ k'ọ rị. Ịya ke ẹ, ẹlẹ kẹni ọ gba okpokoro, kanị o ke ẹ nị wẹ bi imẹ ẹ. Ọ sị, “Mmẹ wụ Osolobuẹ, ọzọ arịa.
19
Ekuni m'ẹ nzuzue, anọnị m ebe tegbu enwẹn ẹ gba ishi ku ẹ — asịnị m ebọn Jekọpụ ‘femẹ m mmaka’, Ezioku k'e mmẹ wụ Osolobuẹ e ku; ntụ arị oku m.
20
‘Gbakikomẹ ni bịa; ụnụ ile gha alị ichẹn-ichẹn gbapụha; ndị hụn e buhunmẹ mmọn wẹ pịn amarịn ihiẹn, ndị hụn a kpọku mmọn ghalẹni a zụọpụha ịhịan.
21
Gwalele ni m nwan ihiẹn k'e mẹ ihun, ku n'ẹ nwan! Wẹ tụgbama iroro kin ihiẹn wẹ k'e kin! Onyẹ kutọ oku ihiẹn ndịnị rị e mẹ kikẹnni? Onyẹ ku oku wẹ mbụ-mbụ — karị mmẹ wụ Osolobuẹ? Onwọnzikwọnị Chuku ọzọ rịnị wezụka m — Chuku hụn rị ọchan, hụn a zụọpụhanị; ọzọ arịa wezụka mmẹ.
22
Buruhẹ nị m nwan nị m zụọpụha ụnụ, ndị ile rị elu-ụwa! Makẹni, mmẹ wụ Chuku, ọzọ arịa.
23
E kungụọ m enwẹn m, ku ihiẹn m ku; a shịapụgụọ m ọnụ ku ihiẹn wụchanrịn ezioku — oku hụn m jẹnkọlẹni d'a kagbu, nị, mkpụkụ ọwụlẹ jẹnkọ d'e gbuni m osekpu, ọnụ ile jẹnkọ d'e ku ẹ ni mmẹ wụ Osolobuẹ.’
24
Wẹ k'a gha a sị, ‘Osolobuẹ sụọ e mẹ ihiẹn furuni, ikẹn wụzịkwọ nke ẹ.’ Wẹ ile hụn bun'ẹ olulu k'a bịa d'a rịọ a, ifẹnrẹn e mẹgbu wẹ.
25
Osolobuẹ k'a tụnị ụmụ Izrẹlụ ile ụya, a nyanma wẹ isi.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes