×

Ika Bible 2018

Azaya 46

1
Bẹlụ wụ mmọn ndị Babilọnụ e gbugụọ osekpu! Nebo wụzị mmọn wẹ e hulụagụọ alị! E gi wẹ anyịnyan lẹ efin buru mmọn wẹ — ibu nwẹn hụ a nyịn, a nyịngbu anyịnyan ndị ahụn buni wẹ.
2
Mmọn ndị ahụn e hulụagụọ, e sekpugụọ wẹ; a sa wẹ ẹka zụọpụha wẹ kẹ wẹ bukọ wẹ; wẹ ile kẹ wẹ kpọnkọ alị ọzọ.
3
Gọn ni m ntịn-o, ebọn Jekọpụ — ụnụ ile ndị họdụ ezi-lẹ-ụlọ Izrẹlụ. Mmẹ bu ụnụ kete w'a tụlẹ imẹ ụnụ; mmẹ bu ụnụ kete ụnụ banlẹ imẹ ẹfọ.
4
D'e rudẹ ni ụnụ a ka ẹgẹdi, pu ẹwọ, mmẹ rọzị, mmẹ k'e dọnmẹ ụnụ ndụn. Mmẹ ke ụnụ, m k'a pa ụnụ, m k'e dọnmẹ ụnụ ndụn, m k'a gbapụha ụnụ.
5
Onyẹ kẹ y'e gi jeni m mọbụ sị nị mmẹ lẹ ịya han? Onyẹ k'i ro n'ọ nọ kẹ mmẹ hụn y'e gi jeni m?
6
Ndị hụn e hupụha goru rị imẹ ẹkpa-goru, a mapụha siliva; a kpọ wẹ ọkpụ-goru n'o gi ẹ kpụ mmọn — a kụnị wẹ mmọn hụ isi alị, fe ẹ.
7
O ru, e bu w'ẹ che uvun, buru ẹ d'e tumẹ ebe o k'a nọdị, ọ nọdị ebẹhụ, ọ s'ẹka gha ebẹhụ pụ. Ịhịan kpọku ẹ, ọ sakọ ẹka za; ọ sakọ ẹka zụọpụha ịhịan imẹ nsọngbu.
8
Nyanhankwọ nị ihiẹnni; bun'ẹ che obi, e ron'ẹ, ụnụ ndị nnupụ-isi.
9
Nyanhan nị ihiẹn ndị hụn mẹni, ihiẹn ndị hụn mẹ mbụ-mbụ; mmẹ wụ Osolobuẹ, ọzọ arịa. Mmẹ wụ Osolobuẹ, onwọnni onyẹ nọ kẹ mmẹ.
10
M'a nọ mbidọn e ku ọgụgụ, e mẹ ndị mbụ-mbụ a marịn ihiẹn rị ihun. M sị: “Ihiẹn hụn m bu obi k'e mẹrịrị; m k'e mẹchanrịn ihiẹn ile m chọ nị m mẹ.”
11
M'a gha ẹbamịn ọwụwa-ẹnyanwụn a kpọha nnụnụ e ri anụ; m'a gha alị hụn tegbu enwẹn ẹ a kpọha okẹnnyẹ hụn k'e mẹ ihiẹn m bu obi. Ihiẹn hụn m ku, m k'e mẹzurịrị a, ihiẹn hụn m romẹ, m k'e mẹrịrị a.
12
Gọn ni m ntịn, ụnụ ndị isi-ikẹn, hụn o mẹni ihiẹn hụ rị mma arị wẹ nsue:
13
M wela nwan ihiẹn ahụn rị mma; ọ rịgụọ nsue; nzụọpụha m rọ, o biekọ d'a bịa. M k'e ye Zayọnụ nzụọpụha; bu ọghọ m che Izrẹlụ ẹhụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes