अब तोहका आपन कोमल ओढ़ना उतारिके कठिन परिस्रम करइ चाही। अब तू चक्की ल्या अउर ओह पइ आटा पीसा। तू आपन घाघरा इतना ऊपर उठावा कि लोगन क तोहार टाँगन देखाइ लग जाइँ अउर नंगी टाँगन स तू नदी पार करा। तू आपन देस तजि द्या।
तू कहा करत रहिउ, ‘मइँ अमर हउँ मइँ सदा रानी रहब।’ किन्तु तू ओन बुरी बातन पइ धियान नाहीं दिहा जेनका तू ओन लोगन क संग किहे रह्या। तू कबहुँ नाहीं सोच्या कि पाछे का होइ।
एह बरे अब, ओ ‘मनोहर मेहरारू,’ मोर बात तू सुन ल्या। तू आपन क सुरच्छित जाना अउर अपने आप स कहा। ‘केवल मइँ ही महत्वपूर्ण मनई हउँ, मोरे समान कउनो दूसर बड़का नाहीं अहइ। मोका कबहुँ भी विधवा नाहीं होब अहइ, मोरे सदैव बच्चन होत रहिहीं।’
तू बुरे काम करति अहा, फुन भी तू आपन क सुरच्छित समुझति अहा। तू कहा करति अहा कि तोहार बुरे काम क कउनो नाहीं लखत। तू बुरे काम करति अहा किन्तु तू सोचति अहा कि तोहार बुद्धि अउर तोहार गियान तोहका बचाइ लेइहीं। तू खूद क सोचति अहा कि बस एक तू ही महत्वपूर्ण अहा। तोहरे जइसा अउर कउनो भी दूसर नाहीं अहइ।
“किन्तु तोह पइ बिपत्तियन अइहीं। तू नाहीं जानतिउ कि उ कब होइ जाइ, किन्तु बिनास आवत अहइ। तू ओन बिपत्तियन क रोकइ बरे कछू भी नाहीं कइ पउबिउ। तोहार बिनास ऍतना हाली होइ कि तोहका तक भी न चली कि का कछू तोहरे संग घट गवा।
अइसा ही हर वस्तु क साथ मँ घटी जेनके बरे तू कड़ी मेहनत किहा। तोहरे जिन्नगी भइ जेनसे तोहार वइपार रहा, उ पचे ही मनइयन तोहका तजि देइहीं, हर कउनो आपन-आपन राह चला जाइ। कउनो भी मनई तोहका बचावइ क नाहीं बची।”