|
| 1 |
|
| Chāi-sek-lú Pa-pí-lûn ah, lo̍h-lâi chē tiàm thô͘-hún! Siàu-lú Ka-le̍k-tí ah, tùi pó-chō lo̍h--lâi, chē tiàm thô͘-kha! Bô lâng ōe koh kóng lí un-jiû á-sī iù-siù. |
|
| 2 |
|
| Khì oe chio̍h-bō, bôa mī-hún! Bīn-phè the̍h-tiāu! Kûn cháng--khí-lâi, lō͘-chhut tōa-thúi liâu-kè khoe! |
|
| 3 |
|
| Lâng ōe khòaⁿ-tio̍h lí chhiah-sin-lō͘-thé; lí ê kiàn-siàu ōe lō͘-hiān. Góa beh pò-ho̍k, chi̍t ê to bōe pàng i soah. |
|
| 4 |
|
| Goán ê Kiù-sio̍k-chú sī Í-sek-lia̍t sîn-sèng ê Siōng-tè; I ê chheng-ho͘ sī Siōng Chú — Bān-kun ê Thóng-sòe. |
|
| 5 |
|
| Siàu-lú Ka-le̍k-tí ah, ji̍p-khì o͘-àm ê só͘-chāi tiām-tiām-á chē; lí bōe koh-chài hō͘ lâng chheng-chòe “Lia̍t-kok ê lú-ông”. |
|
| 6 |
|
| Góa ū tùi góa ê chú-bîn hoat siū-khì, hō͘ ka-kī ê sán-gia̍p siū lêng-jio̍k, kā in kau tī lí ê chhiú-tiong. Lí bô tùi in si lîn-bín, sīm-chì ēng chin tāng ê taⁿ hō͘ lāu-lâng phāiⁿ. |
|
| 7 |
|
| Lí bat kóng “Góa beh éng-oán chòe lú-ông”, só͘-í bô kā chiah-ê tāi-chì khǹg tī sim-lāi, mā bô khó-lū tāi-chì ê kiat-kio̍k. |
|
| 8 |
|
| Taⁿ, lí chit-ê ài iàn-lo̍k, an-ún chē tī pó-chō téng ê lâng, tio̍h chù-ì thiaⁿ! Lí ka-kī sim-lāi siūⁿ-kóng: Chí-ū góa, góa í-gōa bô pa̍t-ê; góa choa̍t-tùi bōe pìⁿ-chòe kóaⁿ-hū, bōe keng-giām sòng-sit kiáⁿ-jî ê khó͘-thàng. |
|
| 9 |
|
| M̄-kú, tī chi̍t ji̍t lāi, chi̍t-ba̍k-nih-kú, chit nn̄g hāng tāi-chì lóng ōe hoat-seng tī lí sin-chiūⁿ, sí-kiáⁿ kap chiú-kóaⁿ chòe-chi̍t-ē kàu! Bô-lūn lí kiâⁿ jōa-chōe siâ-su̍t, liām jōa-chōe hû-chiù to bô-chhái-kang. |
|
| 10 |
|
| Lí chū-sìn chòe pháiⁿ bô tāi-chì, kóng: Bô lâng ōe khòaⁿ--tio̍h. Lí hō͘ ka-kī ê tì-hūi chhong-bêng chhōa-ji̍p phian-lō͘, ka-kī sim-lāi siūⁿ-kóng: Góa kap Siōng-tè pîⁿ tōa, bô lâng ōe-tàng kap góa pí. |
|
| 11 |
|
| M̄-kú chai-hō ōe jip-tio̍h lí, lí m̄ chai tio̍h án-chóaⁿ chiah ōe-tàng kā i kóaⁿ-cháu. Chai-hāi ōe kàng-lo̍h tī lí sin-chiūⁿ, lí bô hoat-tō͘ kā i tû-tiāu. Tī lí m̄-chai ê sî, húi-bia̍t ōe hut-jiân lîm-kàu lí! |
|
| 12 |
|
| Khí--lâi, chòe lí khì liām lí ê hû-chiù, kiâⁿ khah chōe siâ-su̍t; lí tùi siàu-liân ê sî chiū phah-piàⁿ chòe chiah-ê sū. Án-ni, lí khó-lêng ōe sêng-kong, ōe hō͘ te̍k-jîn kiaⁿ kah beh sí. |
|
| 13 |
|
| Lí in-ūi lâng hō͘ lí ê kè-chhek siuⁿ chōe soah ià-siān; khì kiò hiah-ê koan thian-siōng--ê, khòaⁿ chhiⁿ-sîn--ê chhut-lâi kiù lí; in ōe tī chhoe-it-cha̍p-gō͘ ū-giân chiong-lâi ê sū. |
|
| 14 |
|
| Khòaⁿ leh, in ōe chhin-chhiūⁿ be̍h-kó hō͘ hé sio-húi; in bōe-tàng kiù ka-kī thoat-lī hé-iām ê ui-le̍k, hit-khoán hé m̄-sī ōe-tàng chē tī piⁿ--á hang-sio ê ûn-ûn-á hé. |
|
| 15 |
|
| Tùi siàu-liân chiū kap lí kau-kiat, tàu-tīn phah-piàⁿ ê lâng, tòa-lâi hō͘ lí--ê, chòe-āu lóng sī án-ni. In lóng ōe tī ka-kī kéng ê lō͘ sit-bê, bô lâng ōe-tàng kiù lí. |
|
|
|
|