現代台語譯本漢字版
|
| 1 |
| 雅各 的後代,著注意聽! 恁受稱做 以色列 人, 是 猶大 的子孫。 恁指上主的名咒誓, 求叫 以色列 的上帝, 毋拘毋是出佇誠心實意。 |
| 2 |
| 恁自誇是聖城的人民, 所倚靠的是 以色列 的上帝; 伊的稱呼是上主 — 萬軍的統帥。 |
| 3 |
| 上主講: 我真久以前就宣告, 親嘴講互恁知將來會發生的事。 佇恁無拍算的時,我行動, 代誌就成就。 |
| 4 |
| 因為我知,恁的心硬, 頷頸若鐵,頭額若銅, |
| 5 |
| 所以,我對古早就有給恁講, 佇代誌發生以前就有給恁宣告, 互恁𣍐當講: 諸個是阮的偶像所做, 是阮刻的偶像、造的神明註定的。 |
| 6 |
| 我所預言的事今已經攏發生; 此個事實恁豈無欲承認? 對此陣起,我欲互恁知將來新的事, 是恁以前毋知,對恁隱藏的代誌。 |
| 7 |
| 諸個代誌現在才發生, 過去恁攏毋曾聽著, 互恁𣍐當講:阮老早就知。 |
| 8 |
| 恁毋曾聽著,嘛毋知; 恁的耳仔攏毋曾聽過。 我知恁非常詭詐, 對出世,人就叫恁做背叛者。 |
| 9 |
| 我為著保持我的名的榮譽, 忍耐,無發受氣; 我一直忍啲,無給恁毀滅。 |
| 10 |
| 我有給恁提煉, 不過無親像啲提煉銀, 是用痛苦的火給恁鍛鍊。 |
| 11 |
| 我確實是為著家己的緣故; 我無愛互我的榮譽受辱。 我的名哪通受褻瀆? 我無愛別個神明分享我的榮耀! |
| 12 |
| 雅各 啊,著聽! 我所呼召的 以色列 啊,著聽我講! 我是上帝, 是上代先的,嘛是上路尾的。 |
| 13 |
| 我親手下大地的地基; 我用正手搋開天。 我一下命令, 天及地就做夥徛出來。 |
| 14 |
| 恁大家攏著聚集,聚集倚來聽! 豈有神明曾預測我上主所選立的人會攻擊 巴比倫 , 會照我的旨意對付 迦勒底 人? |
| 15 |
| 對伊講話,呼召伊的是我; 我給伊導出來,互伊興旺。 |
| 16 |
| 今,行倚來,聽我講: 對起頭,我一直有公開給恁講, 代誌發生彼時,我就佇遐。 今,至高的上主已經差遣我,賜我伊的氣力。 |
| 17 |
| 以色列 神聖的上帝 — 恁的救贖主按呢講: 我是上主 — 恁的上帝。 我教示恁是為著恁好; 我導恁行應該行的路。 |
| 18 |
| 我偌仔呢期待恁聽我的命令! 若有聽,恁的平安就若河流, 恁的公義會若海湧; |
| 19 |
| 恁的後代會親像海沙, 恁的子孫親像沙赫多。 我𣍐互𪜶的名受剪斷滅絕! |
| 20 |
| 著對 巴比倫 出來,脫離 迦勒底 人! 著歡喜出聲,大聲宣布! 將消息傳到天邊海角,講: 上主已經救贖伊的僕人 以色列 ! |
| 21 |
| 上主導𪜶經過曠野, 𪜶攏無嘴焦。 伊互水對石磐淐出來; 伊互石磐爆裂,互水溢出來。 |
| 22 |
| 上主講: 邪惡的人無平安! |
| 保存笔记 |
https://beblia.bible:81/BibleAudio/chinesettvh/isaiah/048.mp3
66
48