Ninvuɣ’ shɛb’ bɛn be teeku duli mini bɛn be katiŋa, wummiya! Yawɛ daa pun pii ma ka bɛ na bi dɔɣi ma; n daa na bela m ma pul’ ni, ka o pun boli n yuli.
Amaa ka n yɛli, “N tum tuma pam, amaa ka di ka nyɔri. N yihi n yaa tum, amaa ka shɛli bi yi di ni na. Amaa Yawɛ n-nyɛ n nyaanzaana, ka n laara be n Naawuni sani.
Ka pumpɔŋɔ Yawɛ yɛliya ni bɛ daa na bi dɔɣi ma, ka o pii ma leeg’ o dabili ni n zaŋ Yaakubu zuliya bɛn nyɛ Izraɛlnima, ka yam yɔɣu la labis’ o sanna. Yawɛ ti ma jilima. N kpiɔŋ yirila n Naawuni sanna.”
Yawɛ daa yɛli ma, “N dabili, m mali tuun’ kara ni n ti a, ka a labisi Izraɛlnim’ bɛn kpalim la zali bɛ zaashee. N ni zaŋ a leei neesim ti tinzunnima, ka di chɛ ka n tiliginsim paai dunia ŋɔ luɣ’ shɛlikam zaa nima.”
Yawɛ ŋun nyɛ Izraɛl Naawuni ŋun be kasi ŋɔ ni yɛli shɛm zaŋ chaŋ bɛ ni ʒiɛm so ni niriba zaa ni zaɣisi so, ka o nyɛ zuɣulaannim’ dabili la polo m-bɔŋɔ: “Nanim’ ni ti nya a, ka yiɣisi zani ti a jilima, ka nabihi ti nya a ka damdi tiŋ’ ti a jilima. Yawɛ ŋun ʒe yim ka nyɛ Izraɛl Naawuni ŋun be kasi la ni piig’ a la zuɣu.”
Yawɛ yɛliya, “N ni yɛn tiligi ya saha shɛli yi ti paai, n ni niŋ ya nirilim, ka wum yi kuŋa din bɔri kunzoo la. N ni guli ya, ka taɣi ya ka chɛ barina, ka lo niriba zaa alikauli yi zuɣu. N ni lan labisi ya ʒili yi tiŋgbani din do zaɣ’ nɛl’ la ni.
N ni yɛli sarikanima, ‘N tin ya yolisim!’ Ka yɛli bɛn be zibisim ni, ‘Kamiya neesim ni na!’ Bɛ ni ti ŋmanila piɛ’ shɛb’ bɛn be zoya zuɣu tiŋgban’ nɛl’ ni ŋubiri mɔri la.
Alizanda ni nima, yilimiya yila! Dunianima, maliya suhupiɛlli! Zoya, yilimiya yila! Dama Yawɛ ni kpaŋs’ o niriba suhuri. O ni zo o niriba bɛn be muɣisigu ni nambɔɣu.
Neemiya yi nina lihi gili nya, bɛ zaa laɣimmi ka yi sanna.” Yawɛ yɛliya, “ N ni shiri be ŋɔ zuɣu, yi ni ti zaŋ bɛ zaa ye kaman amiliya ni yɛri o salima yɛri shɛm la.
“Yi tiŋ’ daa lumi dahim leei dabari, amaa di pɔri pam pumpɔŋɔ, ka bɛn kanna ni bɛ ti be di ni ni muɣi li. Ka ninvuɣ’ shɛb’ bɛn daa wurim li maa ni zo n-chaŋ katiŋ’ ka chɛn ya.
Di saha yi ni ti ŋmaligi bɔhi yimaŋa, ‘Ka ŋuni n-lee dɔɣi bihi ŋɔ zaa ti ti? N daa kɔŋ m bihi. Bɛ daa zaŋ ma kulila tinzun’ tiŋa, ka ŋuni n-lee wumsi bihi ŋɔ zaa? N daa kpalimla n ko, ka ya ka bihi ŋɔ zaa lee yina?’ ”
Ti Duuma ŋun nyɛ Yawɛ ŋɔ yɛliya, “N ni gahi nuu boli zuliya kam, ka wuhi niriba shihirili; bɛ ni ti zaŋ yi bidibisi maa ŋmab’ bɛ bɔɣuri ni na ti tin ya; ka zaŋ yi bipuɣinsi tuɣi na ti tin ya.
Nanim’ ni ti be kaman yi banim’ la, ka bɛ paɣiba bɛn nyɛ nanim’ be kaman yi manima. Bɛ ni ti damdi ya tiŋa ka lun ya sizuura. Ka yi baŋ ni mani n-shiri nyɛ Yawɛ; ka bɛnkam zaa guhiri n sɔŋsim ku di vi.”
N ni chɛ ka ninvuɣ’ shɛb’ bɛn nahindi ya maa ŋmaligi ku taba. N ni chɛ ka ninvuɣ’ kubo maa kuli ba kaman nir’ ni nyuri wain ka di kuun’ o shɛm la. Ka lala zuɣu chɛ ka daadam kam baŋ ni mani n-shiri nyɛ Yawɛ ŋun nyɛ yi Tiligira ni Izraɛl Naawuni ŋun nyɛ kpiɔŋlana ŋɔ.”