Marsã wã Soaala-Wẽnd sɩd gomame, bãmb yeelame tɩ b naana maam m ma pʋgẽ, tɩ m yɩ b tʋʋm-tʋmda, la m sõnge t'a Zakoob lɛɛg n wa, n sõng t'a Israyɛl lɛɛg n wa tigime. Woto wã m be yõodo Wẽnd nifẽ, la m Soaala-Wẽnd meng la m pãnga.
Bãmb n yeel maam: «Ka sek tɩ f yaa m tʋʋm-tʋmd ninga sẽn na yik a Zakoob kamba sẽn lʋɩ wã la f tall a Israyɛl kamba sẽn kellã n wa ye. M datame tɩ f lebg bu-zẽmba fãa vẽenem, tɩ m fãagrã ta dũni wã yaanga.»
Soaala-Wẽnd gomda ne foo, a Israyɛl Fãagda, a Israyɛl Nin-Sõnga gomda ne ned ninga sẽn ka yãe waoogre, ne dũni ninsaalba sẽn ges a soab wa wɩɩbdã, ne ned ninga na-toosã sẽn kẽes yembdã: «Ad-y dĩm dãmb sã n yãend-fo, b na n yika b zaoorẽ n yals yĩngri, na-komsa na n wõgemda f taoore.» Woto la b na n wilg tɩ b waoogda Soaala, Israyɛl Nin-Sõngã, ned ninga sẽn tũusa foom la b pids b pʋlemde.
Naaba-Wẽnd yeta woto: «M nimbãan-zoeera wakatã, m deega f kosgo, f fãagra raare, m wa n sõng-f lame, m welg-f-la toore la m segl-f lame, la m yalsa f poorẽ tɩ zooda na n le tõog n yõge. M na le yik tẽn-sõngã, sẽn sãam n dɩgã n le maneg-a n pʋɩ.
M na yeel b sẽn pag b rãmb doogo: ‹Yi-y-yã!› M na yeel sẽn be-b likẽ: ‹Wa-y vẽenemẽ!› La soya zutu, tãmsa zutu, b na yɩ wa rũms sẽn kẽnd la b wãbdẽ la sẽn paamd yamdo kunkuba fãa zutu.
Wẽneg f neng n gese, ad-f kamba fãa gilli sẽn tigim taab n watẽ, n wat f nengẽ. La m wẽenda, yaa Wẽnd n gomde, m wẽenda, tɩ b na n yɩɩ fo yĩnga wala faong bũmbu sẽn tar neerem, wala sẽbdg b sẽn sogd pʋg-paala.
Fo na n yeela f sũurẽ: «Ãnna n dog woto fãa n kõ-ma, m da yaa pʋg-kiiri, n ka tar kamb ye, ãnna n wub bãmba tɩ b bɩ? B ra basa maam tɩ m zĩ m ye; dɩlla bãmba yita yɛ?»
Soaala-Wẽnd yeela woto: «M na n kamsa dũni wã rãmba, m na n dʋʋsa m tãb-kaoore b yĩnga. B na n yondga kom-dibli b futẽ n wa kõ foom, la b na n tʋka kom-pugli wã gʋbla n wa kõ foom.
Dĩm dãmb na n yɩ-la f ba-wubdsi, tɩ dĩm-pogsã yɩ f ma rãmba. B na n wõgemda fo taoore, b na n lelma f nao wã tom. Woto f na bãnge tɩ maam la Soaala-Wẽnde. Sẽn teeg-b maam kõn paam yãnd abada.»
Ade, Soaala-Wẽnd yeta woto: «B na n deega zabr gãndaooga nugẽ a sẽn da yõk a soaba n pag roogo, n deeg nin-toaaga nugẽ, a sẽn da fãag laog ningã! Zerizalɛɛm, ad yaa mam meng n na n zab n sõng-fo, la m fãag f kambã.
Sẽn tar-b foom toogã, m na kɩt tɩ b wãb b meng nemdo, m na kɩt tɩ b yũ b zɩɩm n gãeeme wala b yũu rã-paalga, la ninsaalb fãa na n bãngame tɩ maam, Naaba-Wẽnd, la Fãagda, b na bãng tɩ m lʋɩɩsa m toogo, maam, a Zakoob Wẽnd pãng soabã.»