Ọ dụkpọ alị a, kpọnpụchanrịn ọmụma junn'ẹ, gbọ ezigbo vaịnị ye ẹ. Ọ tụn ụlọ-nche ye imẹ ẹ, nọzịkwọ ọmụma rị alị tụ ebe wẹ nọ a pịnpụha manya vaịnị. Ọ nọ tụma ẹnya ogbe vaịnị rị mma, kanị ọ mịn'a vaịnị rịlẹni mma.
Nsọngbu rị e che ụnụ ndị rị e nwọnrin ụlọ e cheni ụlọ, e nwọnrin ọfịa e cheni ọfịa d'e ru n'o nwọnzini ebe họdụnị ndị ọzọ, ụnụ sụọ e biri nwan alị nwẹn.
Wẹ hụ a kpọ ụbọ-hapụ lẹ ụbọ-layẹ imẹ oriri wẹ, a kụ ẹgede-chakachaka, e gbu ẹkpịrị, a ra manya, kanị, onwọnni ihiẹn wẹ kpọ ihiẹn Osolobuẹ rị e mẹ, w'a ra rodẹ ihiẹn ọ chọ n'o mẹ wẹ.
Ili rị nwan e lue ẹkpịrị e che we ọda-ọda, ọ shịapụchanrịngụọ ọnụ; ndị-isi lẹ ndị-mmaka rịn'a sikọ d'a danye imẹ ẹ, wẹ lẹ ndị ọgụn-lẹ-mkpọtụ wẹ lẹ ndị oriri-lẹ-ọrịra wẹ.
Nsọngbu rị e che ndị hụn a kpọ eje-ihiẹn ihiẹn rị mma; a kpọ ihiẹn rị mma eje-ihiẹn. Hụn a sị ishi wụ ukpẹ, a sị ukpẹ wụ ishi; hụn e sị ihiẹn rị e lu ilu rị a nẹnẹ, a sị nị ihiẹn rị a nẹnẹni rị e lu ilu.
Ịya haịn Osolobuẹ gi gi olulu sọn ndị nke ẹ; o weshi ẹka, titu wẹ: ugu e mẹhunmẹ, ozun e jun rịkẹ ẹfịfịa rị ụwaya. Kanị, ihiẹnni ile arọkwọn'a nwan olulu, echẹn kẹ ẹka a rịkwọ elu n'o tizi wẹ.
Onwọnni onyẹ ndụn a gụ, onwọnni onyẹ a kpọgburuni; onwọnni onyẹ e ru ụran, onwọnni onyẹ a ranhịnnị; onwọndẹni akpụkpọ-ukun ọwụlẹ a tọpụnị, onwọnni eriri akpụkụ ọwụlẹ a dọbeni.
Oro wẹ nọ kẹ ebe ẹwọrọ rị e dẹn; wẹ hụ e dẹn kẹ ikoro ẹwọrọ; wẹ hụ a nwụndọn ihiẹn wẹ chụha, e dẹn; e bu ẹ a la, onwọnni onyẹ a saẹka a gbapụha a ẹka wẹ.
Ụhụọhịn hụ, wẹ k'e yi Jerusalẹm oro kẹ ẹwọrọ, oro hụn nọ kẹ ebe ohimin rị a zụn ụzụn. Onyẹ lee alịnị ẹnya ogẹn ahụn, ọ hụn ishi lẹ ụya; igwere k'e gitọ, kpumẹdẹ ukpẹ.