Ne opure maber mi ogolo kite mane nitie, kendo opidhoe mzabibu mabeyo ahinya. Ne ogero ot mabor mar rito e dier puodhono, kendo ne okunyo bur mibiyoe mzabibu e lwanda man kuno. Ne ogeno ni puotheno biro nyagone olemo mabeyo, to kar timo kamano ne onyago mana olemo makech.
En ang’o mane onego atim e puotha mane ok atimo? To kane atimo gik moko duto mowinjore, to ere gima omiyo ne onyago mana olemo makech, to ne ageno ni obiro nyagona olemo mabeyo?
Koro chikuru itu, mondo uwinj gima abiro timo ni puotha mar mzabibu. Abiro pudho chiende oko, kendo abiro muko ohingane, mi dhok gi le nokwaye kendo nonyone piny.
Kamano, anawe okethre. Bende ok nolwer bede olembene, kata doch ok nodoye, to kudho kod pedo ema nogawree, kendo anakwer boche polo mondo koth kik chak chue kanyo.
Puoth mzabibu mar Ruoth Nyasaye Manyalo Gik Moko Duto en Israel, kendo jo-Juda e yath mane orito maber. Ne ogeno ni adiera dibedie, to nek ema ne oneno, bende noparo ni tim makare diyudree, to ywak malit ema ne owinjo.
Yaye, unune malit, un joma kwano richo ka gima ber, kendo ma kwano gima ber ka gima rach. Uluongo mudho ni ler, kendo ler uluongo ni mudho, bende ukwano gik makech ka gik mamit, to gik mamit ukwano ka gik makech.
Emomiyo kaka ligek mach wang’o yugi, mi tieki, kendo kaka tiang’ wang’ mi rum e mach mager, e kaka un bende unulal nono mana ka buru, nimar usechayo chik Ruoth Nyasaye Manyalo Gik Moko Duto, kendo usedagi wach Ng’ama Ler mar Israel.
Kuom mano Ruoth Nyasaye okecho gi joge, kendo oserieyo bade kuomgi mogoyogi, mi gode otetni, kendo ringre jogo obimbore e wang’yore ka yugi. To kata kamano mirimbe pok okue, kendo pod okumogi akuma.
Mano omiyo obiro ting’o bandera kaka ranyisi ma ogwelo oganda moro modak kuma bor. Obiro luongogi mondo giwuogi e tung’ piny, kendo gibiro biro piyopiyo ka giringo,
ma onge ng’ama ol kuomgi kata ma chwanyore, kendo ma onge ng’ama nur kata ma nindo. Bende onge ng’ama okandane ombekni e nungone kata ma tond wuochene ochot.
Ginikog kuom jo-Israel chieng’no, mana ka nam matwaro, kendo ka ng’ato orango piny to mudho gi chandruok ema none, bende wang’chieng’ noimre e boche polo.