|
| 1 |
|
| Siōng Chú án-ni kóng: Góa hō͘ lín lāu-bú ê lî-hun-su tī tó-ūi? Góa kā lín bōe hō͘ tó chi̍t ê chè-chú? Góa sī in-ūi lín ê chōe chiah kā lín bōe--chhut-khì, in-ūi lín ê chōe-kò chiah kā lín lāu-bú kóaⁿ--chhut-khì. |
|
| 2 |
|
| Sī-án-chóaⁿ góa lâi ê sî, lín bô-pòaⁿ-lâng tī--teh? Sī-án-chóaⁿ góa kiò ê sî, lín lóng bô lâng ìn? Sī in-ūi góa ê chhiú-kut siuⁿ té bô hoat-tō͘ sio̍k-hôe lín, á-sī góa bô khùi-la̍t thang kái-kiù lín? Lín khòaⁿ leh, góa chi̍t-ē hoah, hái chiū ta--khì; góa hō͘ kang-hô pìⁿ-chòe khòng-iá. Hî lóng in-ūi chhùi-ta sí--khì, in-ūi bô chúi chhàu--khì. |
|
| 3 |
|
| Góa kā thiⁿ chhēng o͘-saⁿ, kā kiong-chhong khàm môa-pò͘. |
|
| 4 |
|
| Chì-koân ê Siōng Chú kà góa kóng eng-kai kóng ê ōe, hō͘ góa ōe-hiáu ēng ōe hû-chō͘ ià-siān ê lâng. I ta̍k chá-khí kā góa kiò-chhíⁿ, khui góa ê hī-khang hō͘ góa chhin-chhiūⁿ ha̍k-seng ōe-hiáu thiaⁿ-siū. |
|
| 5 |
|
| Chì-koân ê Siōng Chú ū khui góa ê hī-khang, góa bô ûi-pōe, mā bô kū-choa̍t. |
|
| 6 |
|
| Lâng beh phah góa, góa oa̍t ka-chiah-phiaⁿ hō͘ in phah; lâng beh chhoah góa ê chhùi-chhiu, góa tu chhùi-phóe chhut-chāi in chhoah. Lâng bú-jio̍k góa, kā góa phùi chhùi-nōa, góa mā bô ng góa ê bīn. |
|
| 7 |
|
| Chì-koân ê Siōng Chú ū pang-chān góa, góa bōe siū lêng-jio̍k; só͘-í, góa chhin-chhiūⁿ chio̍h-thâu kian-tēng biān-tùi it-chhè, góa chai, góa it-tēng bōe tú-tio̍h kiàn-siàu. |
|
| 8 |
|
| Phòaⁿ góa bô-chōe Hit-ūi teh-beh lâi lah! Siáⁿ-lâng káⁿ khòng-kò góa? Lán chòe-tīn lâi-khì chiūⁿ hoat-têng! Siáⁿ-lâng kap góa choh-tùi? Chòe lí lâi khòng-kò! |
|
| 9 |
|
| Khòaⁿ! Chì-koân ê Siōng Chú ū teh pang-chān góa, siáⁿ-lâng ōe-tàng soan-kò góa ū-chōe? Khòaⁿ! Khòng-kò góa ê lâng lóng ōe chhin-chhiūⁿ saⁿ kū--khì, hō͘ chiù-thâng chia̍h-liáu-liáu. |
|
| 10 |
|
| Lín tiong-kan sím-mi̍h-lâng kèng-ùi Siōng Chú, chun-siú I ê po̍k-jîn ê ōe? I sui-jiân tī o͘-àm bô kng ê lō͘ teh kiâⁿ, mā ōe óa-khò Siōng Chú ê miâ, sìn-nāi i ê Siōng-tè. |
|
| 11 |
|
| Khòaⁿ! Lín só͘-ū tiám-hé, ēng hé-pé bú-chong ka-kī ê lâng, ōe hō͘ lín só͘ khí ê hé, só͘ tiám ê hé-iām siong-hāi. Lín it-tēng ōe tī thòng-khó͘ chiat-bôa tiong tó--lo̍h-khì. Che sī góa chhin-chū kā lín chù-tiāⁿ--ê. |
|
|
|
|