Osolobuẹ sị ndị Izrẹlụ, “Elee ẹkụkwọ-mkpechan kẹ m ye nnẹ ụnụ wụ alị Izrẹlụ, omẹni mkpechan kẹ m kpechan a? Onyẹ kẹ m re ụnụ ye gi kụ ụgwọ — omẹni orire kẹ m re ụnụ? Njọ ụnụ haịn wẹ gi re ụnụ; eje-obibi ụnụ haịn wẹ gi chụpụ nnẹ ụnụ.
Kẹ m bịa, kị haịn o gilẹni nwọn onyẹ rịn'a? Kẹ m kpọ oku, kị haịn o gilẹni nwọn onyẹ zanị? Ẹka m e mẹkẹ nkpụrụ nị asa m ẹka zụọpụha ụnụ ra enwọn m ndụn m'e gi zụọpụha ụnụ? Bụ ọjụgbọ mmaka kẹ m gi e mẹ ohimin a tahị, e mẹ iyi ichẹn-ichẹn e họnrin alị ọkpọ-nkụn azụn rị imẹ wẹ a nwụnhụn, shinkpo, makẹni mirin arịa; ẹgụn-mirin e gbu wẹ!
Di-nwọnni-ẹnyi wụ Osolobuẹ e yegụọ m ire onyẹ wẹ zụn hụn m gi a marịn oku m'e gi gba onyẹ ndụn gụ umẹ. Ụtụntụn ọwụlẹ k'o gi a kpọtiẹn m, a shịapụ ntịn m — kẹni m gọn ntịn kẹ onyẹ wẹ rị a kuzi ihiẹn.
E budẹ m ụgba-azụụn zinmẹni wẹ ebe wẹ rị a fịan m ihiẹn, la nti tọnị ndị rị e huepụ m ẹtu; egini m ifẹnrẹn zueri makẹ ẹmụ wẹ rị a mụ m lẹ ẹsọn wẹ rị a jụkpu m.
Onyẹ imẹ ụnụ ile a tụ egun Osolobuẹ, e mẹ ihiẹn odibo Osolobuẹ sị a mẹ? Onyẹ hụn rị a gha imẹ ishi, onyẹ hụn nwọnlẹni ukpẹ, hụnyẹ ya gi ẹfan Osolobuẹ dọn ẹnya, ya tụkwasị Chuku ẹ obi.