Yaool n yaa tõnd namsgo la a reeg n namse, a wʋma toogo sẽn da tog n yɩ tõnd dẽnna. Tɩ tõnd bas n tẽed tɩ Soaala-Wẽnd n sɩbg-a, tɩ Wẽnd, n wẽ-a, tɩ Wẽnd n ning-a yãnde.
B talla a lengre, t'a bas a menga, a pa yaag a noor ye. Wala pe-bila b tall-a lame n na tɩ kʋ, wala pe-yãanga b tall-a lame n na n tɩ wõrs a kõbdo t'a pa yaagd a noor ye. Tʋʋm-tʋmda me pa yaag a noor ye.
Yaa Soaala n da yalse tɩ b sõgna yãend toogo la b waa n sãoog-a lame, t'a sɩd kɩsa a vɩɩma a taab yĩnga. A yõor na n yɩɩ woko la a na n le roga kamba. Soaala-Wẽnd na n tũ yẽ maasem n pids b raabo.
«A namsga sẽn yɩ wʋsga poore, Soaala n gomde, m tʋʋm-tʋmda na n vɩɩndame la a vɩɩm na n yɩ-a-la noogo. Ninsaalba taoore m na n yals-a-la wa nin-sõngo t'a sak n tʋka b yel-wẽna a zugẽ.
Yaa rẽ yĩnga la m na n zẽk a zugu nin-bɛda sʋka la a na n naaga pãn-dãmbã n deeg a raood pʋɩɩre. Bãng-y t'a rɩka a menga n bas ne kũum tõogo, t'a basame tɩ b sõd-a yel-maandb sʋka. La yaool n yaa zãma wã beegre la a tʋk yã, yaool n yaa yel-maandba yĩnga la a ra yõkd sɛɛga.»