Ka likel sargo iek lulunllin zeleni angla le, ta sargo iek zila katar e phuv suki, inai sar te dikhe pe lete, inai sukar, ka dikha le bi te avel sukaripe ande lete te avel amenge drago.
Ande nuzda ta e briga, ni phenda niso, sargo iek bakro inllarde le te mundaren le, ta sargo o bakro kana chinen leke bal, ni phenda niso ta ni putarda po mui.
Nakhlo pe rubie ta pe kris ta mundarde le, a leki vicha ¿ko ka llinel la? Soke ikande le katar o sueto kai zivil, ta avilo dukhado pala o bilachipe me foroko.
A o Del mangla te dukhavel le, ta cherda le te nakhel pe nuzda. Kana ka del pe kurbano pala o bilachipe, ka dikhel porodo, ka zivil but burs, ta o Del ka avel bariardi ande leko va.
Ka dikhel o lachipe pala duk kai nakhla, ta ka avel veselo, pala e ezgode kai llanel ka llinel chache bute llenen mo sluga o chacho ta ka inllarel lengo bilachipe.
Goleke me ka dav le iek than e barenchar, ta e zuralenchar ka fulavel so dobisarda, soke chordilo leko zivoto llik kai o meripe, ta avilo llindo e bilachenchar, a inllarda o bilachipe bute llenengo ta molisailo pala gola kai ni kanden.