×

BIBELE 1951

Esaia 54

1
Hlalala wena moopa o sa belegego. Hlalala o hlakele wena o sa tsebego mašoko a pelego; gobane bana ba yo a dulago a nnoši ba atile go fetiša ba e a nago le monna. O realo Morena.
2
Katološa lapa lago, hlaka ya ngwako wa gago e dire e kgolo e name, mathudi a ahlame, o tseme dikokwane.
3
Gobane le tlo tlala naga thoko ya go le letona le go la ntsogošo; ba geno ba tlo rua bantle, ba dula metseng ya marope.
4
Se boife, o ka se lewe ke dihlong; se tlale maseme, gobane o ka se šegamišwe; gobane nyatšego ya mola o sa le e mofsa o tlo e lebala; le tšhego ya mola o le mohlologadi o ka se hlwe o di gopola.
5
Gobane Mong wa gago ke yena Mmopi wa gago Morena wa mašaba; Molopolodi wago ke yena Mokgethwa wa Isiraele, ke eo ba rego ke yena Modimo wa lefase lohle.
6
Gobane Morena o go biditše o le bjalo ka mosadi e a lahlilwego, o nyamile pelo, o le bjalo ka mosadi e a bego a tšerwe e sa le e mofsa, mme a lahlwa. -- O realo Morena.
7
Ke be ke go tlogetše ka lebakanyana fela; ke tlo buša ke go kgobela ka dikgaugelo tše kgolo.
8
Ke be ke go utetše sefahlogo sa ka ka lebakanyana la ge ke sa befetšwe. Bjale ke tlo go gaugela ka botho bjo bo sa felego. -- O realo Morena, Molopolodi wago.
9
Go nna taba ye e swana le yela ya mehla ya Noage, mola ke ena ka re: Meetsefula a Noage a ka se boele a tlela lefase. Bjale ke ena ke re: Nka se go galefele; nka se go kgalemele.
10
Dithaba di ka tloga, le meboto e ka tekema; ge e le kgaugelo ya ka yona e ka se ke ya go tloga; mme kgwerano ya ka ya khutšo e ka se ke ya tekema!
11
O realo Morena Mogaugedi wa gago.
12
Wena sešuana seutlautlwa ke ditimo, se sešogo sa homotšwa! Ke nna ke tlogo go thea ka mabje a mabala a mabotse; ke tlo go thekga ka mabje a dipheta,
13
Ka ruma merako ya gago ka ditalama, ka ruma mejako ya gago ka mabje a matsaka; mellwane ya gago yohle ke e thakga ka magakabje a bohlokwa.
14
Baagi ba gago ka moka ba tlo rutwa ke Morena; mme molao wa bana ba gago e tlo ba o mogolo.
15
Toko e tlo go thekga, o le kgole le go pateletšwa; gobane o ka se boife, o le kgole le dikotsi, di sa go batamele.
16
O tsebe gore ba tlo go rumola, ba sa rongwa ke nna; e a go rumolago, o tlo wa ka tše a go dirilego tšona.
17
Ka gobane ke nna Mohlodi wa morudi wa go ubela mollo wa magala, a rula lerumo sebopša sa gagwe; ka buša ke eba Mohlodi wa tše di le senyago, lerumo, le se dire selo.
18
Gobane marumo ka moka a a rulelwago go lwa nago, a ka se kgone selo. Maleme ka moka a a go pharago o tlo a fenya tshekong. Ke bjona bohwa bja balata ba Morena; ke tšona di tlogo ba lokela di etšwa go nna, o realo Morena.
Sotho Bible 1951
Bible Society of South Africa 1986
:
Boloka Lintlha