|
| 1 |
|
| “Chhùi-ta ê lâng, lâi, chia ū chúi! Bô-chîⁿ ê lâng mā lâi, lâi bóe, lâi chia̍h! Lâi bóe chiú, bóe lin! M̄-bián chîⁿ, m̄-bián tāi-kè. |
|
| 2 |
|
| Ná tio̍h khai-chîⁿ bóe bōe-chia̍h--tit ê mi̍h? Ná tio̍h ēng lô-khó͘ thàn ê chîⁿ bóe chia̍h bōe pá ê mi̍h? Lín chù-ì thiaⁿ góa kóng, chiū ū hó-mi̍h thang chia̍h, thang hióng-siū siōng-hó ê chia̍h-mi̍h, hō͘ lín boán-chiok. |
|
| 3 |
|
| “Lín tio̍h àⁿ hī-khang thiaⁿ, lâi chiū-kūn góa; tio̍h thiaⁿ, lín chiah ōe oa̍h. Góa beh kap lín li̍p éng-oán ê iok, hō͘ lín tit-tio̍h góa èng-ún Tāi-pi̍t hit-ê khak-si̍t put-piàn ê thiàⁿ. |
|
| 4 |
|
| Góa ū chí-phài i chòe bān-kok ê kiàn-chèng-jîn, chòe bān-bîn ê léng-siù thóng-tī in. |
|
| 5 |
|
| Lí khòaⁿ, lí ōe tiàu-chi̍p lí í-chêng m̄-bat ê kok-bîn; m̄ bat lí ê kok-bîn lóng ōe chông-lâi tâu-khò lí. Siōng Chú — lí ê Siōng-tè beh chhiok-sêng chit-ê sū; Í-sek-lia̍t sîn-sèng ê Siōng-tè beh hō͘ lí siū chun-tiōng, tit-tio̍h êng-iāu.” |
|
| 6 |
|
| Tio̍h thàn Siōng Chú chhē ōe tio̍h ê sî, chhē-kiû I; thàn I tī sin-piⁿ ê sî, kiû-kiò I. |
|
| 7 |
|
| Siâ-ok ê lâng tio̍h khì-sak in ê tō-lō͘; put-gī ê lâng tio̍h kái-piàn in ê siūⁿ-hoat. In tio̍h kui-ǹg Siōng Chú, I ōe lîn-bín in; tio̍h kui-ǹg lán ê Siōng-tè, I ōe khoan-hông sià-bián in. |
|
| 8 |
|
| Siōng Chú kóng, “Góa ê ì-liām m̄-sī lín ê ì-liām; góa ê tō-lō͘ m̄-sī lín ê tō-lō͘. |
|
| 9 |
|
| Thiⁿ pí tōe khah koân, siâng-khoán, góa ê tō-lō͘ pí lín ê tō-lō͘ khah koân, góa ê ì-liām mā pí lín ê ì-liām khah koân. |
|
| 10 |
|
| “Chhin-chhiūⁿ hō͘ kap seh tùi thiⁿ kàng-lo̍h, bô koh tò-tńg, beh lūn-te̍k tāi-tōe, hō͘ ngó͘-kok puh-íⁿ tōa-châng, hō͘ iā-chéng--ê ū chéng-chí, hō͘ lâng ū bí-niû; |
|
| 11 |
|
| tùi góa ê chhùi kóng-chhut ê ōe mā ōe án-ni; góa ê ōe choa̍t-tùi ōe si̍t-hiān, bōe lo̍k-khong. Góa ê ōe beh oân-sêng góa ê kè-ōe; góa ê ōe beh sêng-chiū góa ài chòe ê tāi-chì. |
|
| 12 |
|
| “Lín ōe hoaⁿ-hoaⁿ-hí-hí lī-khui, siū ín-chhōa pêng-pêng-an-an tńg--khì. Tōa-soaⁿ sió-soaⁿ ōe tī lín bīn-chêng chhut-siaⁿ chhiùⁿ-koa; chhân-iá ê chhiū-ba̍k ōe phah-pho̍k-á hoaⁿ-hí. |
|
| 13 |
|
| Í-chêng ū chhì-phè ê só͘-chāi ōe hoat chhêng-peh; ū chháu-chhì ê só͘-chāi ōe hoat tiông-chheng-chhiū. Che beh chòe éng-kiú put-bia̍t ê kì-hō, hō͘ lín ōe-kì-tit Siōng Chú ê chok-ûi.” |
|
|
|
|