1
“Naama! Inwe mwensi abamore nerang’o, inchuo monywe amache! Inwe aba motabwati chibesa, inchuo mogore endagera morie! Inchuo mogore edivai na amabeere motari goakana chibesa, gose korua kende.
2
Nase ki mokorua chibesa chiaino kogora egento getari endagera? Nase ki mokwerosia gokora emeremo ase eke getari goisanekia? Ntegerere moigwe, nainwe morie eyere engiya, namogokere endagera enoru.
3
“Tegerera moigwe, erio moche asende. Igwa! Erio nario moranyare koba moyo. Ninkore nainwe okobwatana kw’ogotianania gwa kare na kare, naende nimbaorokerie obwanchani bwane bwa botambe obo narierete Daudi eira.
4
Rora, nigo namobegete abe kirori one ase abanto, naende abe omoraai na omochiki igoro ase abanto.
5
Naama! Aye norangerie abanto b’ebisaku otamanyeti, na abanto b’ebisaku batakomanyeti mbaminyoke gocha asore, ase engencho y’Omonene, Nyasae oo, oyore Omochenu bw’Abaisraeli, ekiagera okoeire obonene.”
6
Morigie Omonene ekero akonyorekana, morangerie erinde abakonye ekero are ang’e!
7
Tiga omokori amabe atige chinchera chiaye, na oyo otari omoronge atige ebirengererio biaye. Omonto oyio tiga airane ase Omonene, nere amororere amabera, ee, ase Nyasae oito, ere namwabere kegima.
8
Omonene nigo agoteba iga: “Ebirengererio biane tibiri buna ebiaino, gose chinchera chiaino tichiri buna echiane.
9
Buna koreng’ana igoro ere igoro mono korwa ase ense, naboigo ne chinchera chiane chire igoro mono kobua echiaino, na ebirengererio biane nabo bire kobua ebiaino.
10
“Buna embura na amagena ’embura bigotwa korwa igoro, na tibikoirana gochia igoro, korende nigo bikonyiyia riroba, erinde ebimeri biamera na kwama, erio ense yama chimbusuro chikobusurwa, na endagera ekoriegwa,
11
naboigo ne ring’ana rikorwa ase omonwa one rirabe. Tirikong’iranera bosa, korende ndiikeranie okogania kwane, naende ndikore aya naritomete rikore.
12
“Inwe mosoke more nomogoko, motang’anwe more nomorembe. Ebitunwa na ebigoro mbitere ase amasio aino, na emete yonsi y’orosana neake chinkobi.
13
Aase amagwa are, emetarakwa nemereo, na aase amageri are emeadasi nemereo. Eyio nebe ekoraria obonene bw’Omonene na ekemanyererio gia kare na kare getasarigwe nonya ng’ake.”
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020