×

Ika Bible 2018

Azaya 55

1
Bịa nị, ụnụ ile ẹgụn mirin rị a gụn, bịa nị ebe mirin rị; kẹ onyẹ ọwụlẹ gilẹni egho, bịa nị d'e ṅọnrin ihiẹn-oriri ri! Bịa d'e ṅọnrin manya lẹ mirin-ẹran ọfẹ, onwọnni ihiẹn ụnụ k'a kụ!
2
Kị ụnụ rị e tuhuni egho e ṅọn ihiẹn wụlẹni ihiẹn-oriri, a rụngbu enwẹn ụnụ yeni ihiẹn ghalẹni e jun ẹfọ? Gọn m ntịn ọhụnma-ọhụnma, n'ị hụn ụzọ ri ihiẹn rị mma, ezigbo ihiẹn-oriri hụn jẹnkọ d'a rịchanrịn ị mma.
3
Gi ihiẹn m ku dọn, n'ị bịa d'e kunrun m, gọn m ntịn kẹni ị rị ndụn. M k'e kwe i nkwa hụn m k'e mẹsọnmẹ jẹnrin ejẹn, nkwa ihiẹn-ọsụsụọ m hụ ghalẹni a gụ, hụn m kwe Defidi.
4
Lee ẹ, e gigụọ m'a họnrin ọshẹri jẹnni ndị alị ichẹn-ichẹn, onyẹ-ndu lẹ ọkị-agha alị ichẹn-ichẹn.
5
Eziẹ, ị k'a kpọ alị ndị ị marịnlẹni oku, alị ndị marịnlẹn'i a gbahadẹ d'a za ị, makẹ ufiri Osolobuẹ, Chuku i — Onyẹ-nsọ Izrẹlụ, makẹni o yeọlẹ i ọghọ ọda-ọda.
6
Chọ Osolobuẹ ogẹn y'e gi hụn a; kpọku ẹ ogẹn o gi rị nsue.
7
Onyẹ eje-omumẹ ya la eje-obibi ẹ tọ; eje-ịhịan ya la eje-iroro ẹ tọ. Ya kinhẹn d'e kunrun Osolobuẹ, n'ọ hụn ụzọ mẹn'ẹ omikẹn; ya kinhẹn d'e kunrun Chuku ẹnyi, makẹni o k'a gbagharịchanrịn a.
8
Osolobuẹ sị, “Ẹlẹ ihiẹn ụnụ e ro kẹ m'e ro, m'ara mẹ ihiẹn kẹ ụnụ e mẹ.”
9
Kẹ igwere dọn jẹnnahịn ụwa elu, ẹrịra kẹ ụzọ m dọn ka ụzọ ụnụ, ẹrịra kẹ iroro m dọn ka iroro ụnụ,
10
Kẹ o dọn mẹni mirin e zueni lẹ mirin-ọchan wụ sno e ziẹnni hụn a gha igwere a bịa ara lakin igwere manị alị rapụ, ihiẹn-akụnkụn e gi wẹ pu, mẹ ọhụnma, alị a mịnị onyẹ-ugbo mkpụrụ w'a kụn, mịnị onyẹ e rini ihiẹn w'e ri,
11
ẹrịra kẹ oku gha m ọnụ pụha nọ: o kinhẹnkọ mmaka, kama, o k'e mẹrịrị ihiẹn m chọ, rụnpụha ihiẹn m gi ufiri ẹ ku ẹ.
12
Ịghọghọ kẹ y'e gi pụ, udọn kẹ w'e gi dupụha ị; ugu lẹ òke hụn ị a bụma wẹ ẹbụ; osisi ile rị ọfịa k'a hụn ị kpọma ẹka.
13
Osisi-ọma wụ saịprẹsị jẹnkọ d'a nọkin ẹnya ogun; ezigbo mẹtụlụ e suemẹ ẹlẹzi mkpọ-alị. Osolobuẹ k'e gi ẹ nwọnri ẹfan, ọ wụrụ ahịma itẹbitẹ, hụn jẹnkọ d'a rịsọnmẹ jẹnrin ejẹn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes