Ko-yũud sẽn tar b rãmb fãa, wa-y tɩ koom bee ka ba y ka tar ligdi bɩ y wa. Wa-y tɩ kood me la b kẽes raaga la ka yiisd ligdi n daadẽ ye. Bĩisim la rãam me yaa boto.
Bõe tɩ y na n sãam y ligdi n da bur sẽn ka yiisd kom, bõe tɩ y na n nams y mense n yaool n ka ne yõodo? Y sã n sak n kelg-ma, y na paam rɩ-sõng n dɩ, y na tɩgs y mens ne sẽn ya sõmb n yɩɩda.
Kelg-y neere, wa-y mam nengẽ! Kelg-y tɩ y na vɩɩnde! Ad-y yaa Soaala n gomde: «Yaa zood sẽn kõn sɛ la m na n yõg ne yãmba. A Daviid sẽn paam kũun niynsa la m na n kõ yã.
Foo me, Israyɛl, fo na n kamsa sãamba neb sẽn ka mi-fu, tɩ fo me ka mi-b ye, la mam yĩnga b na n zoe n waame, tɩ maam, Soaala-Wẽnd, a Israyɛl Nin-Sõngo n kõt-f zu-noog kãnga.»
Bɩ nin-wẽng yi a so-wẽng pʋgẽ, tɩ yel-wẽn-maand bas a tags wẽnse. B sã n lɛɛg n wa Soaala-Wẽnd nengẽ, Wẽnd na n zoe-la b nimbãanega, tɩ tõnd Soaala-Wẽnda sũur yalma, la b pa mongd b sugr ye.
Tʋʋlgo bɩ waoodo, saaga pa rʋʋgde tɩ kooma le lɛɛg n kul yĩngri tɩ tẽnga ka madg ye. A madgda tẽnga tɩ b bʋde, tɩ sẽn bʋd yi n wom biisi, tɩ koaada paam a rɩɩbo.
Gõosa zĩigẽ yaa taamse n na n yi, sɩlg-nao-yẽesa zĩig na n yɩɩ luiili sibi. Rẽ na n waa ne Soaala-Wẽnd pẽgr kãsenga a na n yɩɩ zood kaseto, zood sẽn ka tõe wã abada.