O jẹnkọ d'a rịnị onyẹ e mẹ ihiẹnni mma — onyẹ hụn e mẹ ẹ e mẹsọnmẹ: onyẹ hụn e dọnmẹ Ụhụọhịn Ezumikẹn nsọ, rịlẹni e mẹrụ a; onyẹ hụn ghalẹni e bu ẹka e che eje-ihiẹn.
Makẹni, Osolobuẹ sị, ‘Ndị ahụn rị e feni m hụn gilẹni nwunyẹ lẹ ụmụ bụ wẹ hụ e dọnmẹ iwu Ezumikẹn m rị ichẹn-ichẹn, a họrị ihiẹn a sụọnị m e mẹ, e kwọnkẹnmẹ iwu m,
uwẹ kẹ m sikọ d'e ye ọghọ imẹ Ụlọ-nsọ m ile lẹ ebe ile mgbọn ẹ ru, e mẹ m wẹ a nyanhansọnmẹ wẹ, e ye m wẹ ezigbo ẹfan hụn kadẹ ụmụ-ikpoho lẹ ụmụ-ikẹnnyẹ; m k'e ye wẹ ẹfan itẹbitẹ, hụn jẹnkọlẹni d'a gụ.
O mẹ nke ndị alị ọzọ hụn we enwẹn wẹ kwanị Osolobuẹ — kẹni wẹ hụn ụzọ a rụnn'a ọrụn, a wụ ndị ẹfan Osolobuẹ a sụọ ụsụọ, e fe ẹ ofufe, ndị ile hụn e dọnmẹchanrịn Ụhụọhịn Ezumikẹn nsọ, e kwọnkẹnmẹ iwu m,
m k'e wẹhẹ wẹ Ugu nsọ m, ye wẹ ịghọghọ imẹ Ụlọ m wẹ nọ e mẹ ekpere. M k'a narịn kẹ oyiye wẹ kpọ ọkụn kẹ ẹjan ndị ọzọ ile hụn wẹ k'e wẹhẹ elu ukpo nchụn-ẹjan m; makẹni wẹ k'a kpọ Ụlọ m Ụlọ alị ile a nọ e mẹ ekpere.’ ”
Ndị-nche Izrẹlụ wụ ndị ẹnya-ishi, amarịn wẹ ihiẹn, nkitẹ odin a gba nkịtịn kẹ wẹ ile wụ w'a ra saẹka a gbọ, w'e dinẹsọnmẹhụ, a rọ nrọ — ụran a sụọka wẹ.