Yimɓe ƴami: “Ko suumaye nafata to a faalataa ɗum? Ko yaŋgititgo ko'e amin nafata to a hakkilantaa ɗum?” Jawmiraawo jaabi: “Ndaa, nyannde on ɗon cuumo, on ɗon mbaɗa ko on ngiɗi, on ɗon ɓilla huuwanooɓe mon.
On ɗon leestina ko'e. Kanjum woni suumayeere nde ngerdotoomi na? On ɗon tura ko'e mon bana kewal, on ɗon mbaalo dow limce buhuuje e ndoondi. Kanjum mbi'oton suumaye, nyalaade nde fottanta yaa Jawmiraawo na?
To on torake yam, mi jaaboto on. To on ngookani yam ngam ballal, mi wi'an: Na'am. To on acci toonyaago e sappaago yimɓe bee kooli e wolwugo bolle kalluɗe,
Min Jawmiraawo mi ɗowan on foroy, mi haarnan on caka lesdi njoordi, mi semmbiɗinan i'e mon. On laatoto bana jarne cafaaɗe, bana seeɓoore nde sooyataa ndiyam.
Jawmiraawo wi'i: “To on kakkilani nyannde siwtorde, to on cuklanaaki kuuɗe mon nyalaade am seniinde, to on ceyorake nde, to on teddini nde, to on tokkaaki laabi mon, on mbolwataa bolle meereeje,
nden kam ɓerɗe mon keɓan welwelo haa am. Mi daaynan on cakle duniyaaru fuu. Mi laatinan on jaaliiɓe, on caaloto dow kooseeje lesdi. Mi nyaamnan on nder maral ngal ndokkumi kaaka mon Yaakubu. Min Jawmiraawo wi'i ɗum.”