Onwọnni onyẹ a chọ ezioku; onwọnni onyẹ e kinchanrịn ihiẹn mẹni. Ikpe wẹ rị e kin ghalẹni e ru alị kẹ wẹ gi e dọn ẹnya, a tụsọnmẹ ntụ; w'e rotọsọnmẹ eje-ihiẹn e mẹ.
Wẹ e rotọ eje-ihiẹn kẹ ẹjụ-alị dọn e bu ẹkwan ẹfọ lẹzi kẹ akpụkpa dọn a tan ntan-akpụkpa — onyẹ ri ẹkwan wẹ, ọ nwụnhụn, wẹ gbu ẹkwan wẹ, agwọ e gbuni a pụha.
Ya haịn Osolobuẹ gilẹni a tụnị ẹnyi ụya; ya haịn ihiẹn te furu n'o ru ẹnyi ẹka gilẹni e ru ẹnyi ẹka. Ẹnyi hụ a chọ ukpẹ, kanị ishi kẹ ẹnyi rị nwan a hụn; ẹnyi hụ e lee ẹnya nị eki fọnni ẹnyi, kanị imẹ ẹkpa-ishi kẹ ẹnyi rịkwọ nwan a gha.
Ẹnyi hụ e dẹn kẹ eje-anụ, e yi oro kẹ nduru; ẹnyi hụ e che nị Osolobuẹ tụnị ẹnyi ụya, ọ tụnịnị ẹnyi; ẹnyi hụ e che nzụọpụha ẹnyi, kanị nzụọpụha aridẹni nsue.
Ọ hụn a nị onwọnni onyẹ rịn'a, ọ tụ a ẹnya ọda-ọda nị onwọnni onyẹ e buche ọnụ nị wẹ dọnzi ihiẹn. Ya kẹ ọ nọ gi ẹka a wẹhẹ nzụọpụha. Ezi-omumẹ ẹ ye ẹ ndụn o gi mẹ ẹ.
O yiri ezi-omumẹ rịkẹ ẹwuru-igwe onyẹ-agha gi e gbọndọn obi; kpuru nzụọpụha nọkẹ okpu-igwe onyẹ-agha; yiri mmẹgwarị o k'e mẹgwarị ndị-iṅẹnrẹn ẹ lekẹ ẹwuru; olulu ọ rị e bu nọ a kẹ mgburu ọ tụye olu.
Ịhịan ile a gbaye Osolobuẹ — kẹ ndị rị ẹbamịn ọdịdan-ẹnyanwụn ịhịan ile e ye ẹ ọghọ — kẹ ndị rị ẹbamịn ọwụwa-ẹnyanwụn, makẹni Osolobuẹ k'a bịa nọkẹ okẹn iyi rị e huni, okẹn iyi hụn ufere Osolobuẹ buhẹ.