Kedariw ka begɛnw bɛɛ bena ɲɔgɔn lajɛn i fɛ, Nebayɔtikaw ka sagajigiw be kɛ i ka bila la. U bena o kɛ saraka ye a ka sarakabɔyɔrɔ kan, o bena diya a ye fana. A bena boɲa la a ka soo kan.
Jii cɛma dugukolo kan mɔgɔw be nana ne fɛ, kurunbabaw le be ɲafɛ. U be nana n'i deenw ye ka bɔ yɔrɔjan, n'u ka warigwɛ, n'u ka sanu ye. U be nana boɲa la Masaba e ka Ala kan, Isirayɛli ka Ala, ale min ye boɲa la i kan.
Masaba ko: «Jamana wɛrɛ mɔgɔw le bena i laminikogo lɔ, u ka masaw bena baara kɛ i ye. Bari, dimikojugu fɛ, ne tun y'i tɔɔrɔ. Nga sisan a diyara ne ye ka makari i la.
I tɔɔrɔbagaw deenw bena na biri i kɔrɔ. Minw bɛɛ tun b'i lɛɛbura, olu bena biri k'u teen gwan i ɲafɛ. U bena i wele ko Masaba ka dugu, Isirayɛli ka Ala ka * Siyɔn.
I koo tun goyara mɔgɔw ye, u y'i fili, hali mɔgɔ si tun te tɛmɛ i fɛ. Nga ne bena i kɛ kunkɔrɔtafɛn ye tuma bɛɛ, ne bena i kɛ waati bɛɛ mɔgɔw ka nisɔndiya bɔyɔrɔ ye.
Siya wɛrɛw n'u ka masacɛw bena janto i la i ko muso n'a ka denɲɛnin. O la, i ben'a lɔn ko i kisibaga ye ne Masaba ye, i kunmabɔbaga ye Yakuba ka Setigi ye.
Ne ben'a to u be na ni sanu ye zira nɔɔ na, ka na ni warigwɛ ye nigɛ nɔɔ na, u ka na ni zira ye lɔgɔ nɔɔ na, u ka na ni nigɛ ye kabakuru nɔɔ na. Hɛrɛ ni tilenninya le bena bila aw ɲa.
Benkanniko tena mɛn i ka jamana kɔnɔ tugu. Cɛnni, ani halakili tena mɛn tugu fɔɔ ka ta'a bila i ka yɔrɔ daan na. I laminikogo tɔgɔ bena la ko Kisili, a dondaw bena wele ko Tanuli.
Tile tena kɛ i ka yeelen ye tilefɛ tugu, kalo tena kɛ i ka yeelen ye sufɛ fana. Ne Masaba bena kɛ i ka yeelen ye tuma bɛɛ. Ne, i ka Ala bena kɛ i ka dawula ye.
Denbaya min mɔgɔw man ca, olu bena buguya ka se waa kelen ma. Siya min fanga ka dɔgɔ, olu bena kɛ setigiw ye. N'o kɛwaati sera, ne Masaba le bena teliya k'o kɛ.»