A yi'an ɗum, a seyoto, seyo ma waŋgan. Ɓernde ma welweltan ngam seyo. Ngam jeynitaare mbeela waylititto gal maaɗa, risku ummaatooje boo waran haa maaɗa.
Tokke Keedar fuu mooɓoto haa maaɗa. Jawɗi Nebayot laatanto ma lii'eteeɗi. A lii'oto ɗi dow hirsirde, mi yerdoto ɗi. Mi mawninan daraja suudu am ko ɓuri naane.
Duuɗe ɗon tammoro yam, laanaaje Tarsis ɗon ardo, haa ɗe ngartira ɓikkoy ma e cardi ma e kaŋŋeeri ma diga daayiiɗum. Ɓe ɗon ngara maŋgtugo innde Jawmiraawo Allah maaɗa, mo Ceniiɗo Isra'iila, mo hokki ma daraja.
Tedduŋgal Libanon waran haa maaɗa, non boo leɗɗe cemmbiɗɗe e irin leɗɗe booɗɗe mawɗe e pamare fuu ngam fawnugo nokkuure am seniinde. Mi teddinan nokkuure nde kosɗe am njaaɓata ton.
Naaŋge laatataako annoora ma nyalawma fahin, lewru boo yaynantaa ma jemma. Min Jawmiraawo mi laatoto annoora ma haa foroy, min Allah maaɗa mi laatoto jayŋgol ma ɗelkanŋgol.