×

Maayong Balita 2012

ISAIAS 60

1
Magtindog ka, O Jerusalem, kag magsilak kaangay sang adlaw, ang himaya sang Ginoo nagasilak sa imo!
2
Ang iban nga mga kapungsoran pagatabunan sang kadudulman, pero sa imo magasilak ang kapawa sang Ginoo, ang himaya sang iya presensya magaupod sa imo!
3
Ang mga kapungsoran magapalapit sa imo kapawa, kag ang mga hari sa pamanagbanag sang imo bag-o nga adlaw.
4
Tulok ka sa imo palibot kag tan-awa kon ano ang nagakahanabo: Ang imo mga tawo nagatipon sa pagpauli! Ang imo mga anak nga lalaki magapauli halin sa malayo nga mga lugar, ang imo mga anak nga babayi pagakugoson kaangay sang mga kabataan.
5
Makita mo ini kag mapun-an ka sing kalipay, magakurog ka sa kakunyag. Ang manggad sang mga kapungsoran pagadalhon sa imo, halin sa tabok sang kadagatan magaabot ang ila mga manggad.
6
Ang malawig nga katay sang mga kamelyo magaabot, halin sa Midian kag Efa. Magaabot sila halin sa Seba, nga nagadala sang bulawan kag insyenso. Ang mga tawo magasugid sang maayong balita nahanungod sang ginhimo sang Ginoo!
7
Ang tanan nga mga karnero sang Kedar kag Nebayot pagadalhon sa imo subong mga halad, kag idulot sa altar sa paglipay sa Ginoo. Ang Ginoo magahimo sang iya Templo nga mas mahimayaon pa sang sa una.
8
Ano bala ini nga mga sakayan nga nagalupad kaangay sang mga panganod, kaangay sang mga pating nga nagapauli?
9
Ini sila mga sakayan nga halin sa malayo nga mga kapungsoran, nga nagadala pauli sang mga tawo sang Dios. May dala sila nga pilak kag bulawan, sa pagpasidungog sa ngalan sang Ginoo, ang balaan nga Dios sang Israel, nga nagbuot nga ang tanan nga mga kapungsoran magpasidungog sang iya mga tawo.
10
Ang Ginoo nagasiling sa Jerusalem, “Ang mga dumoluong magapatindog liwat sang imo mga pader, kag ang ila mga hari magaalagad sa imo. Sa akon kaakig ginsilutan ko kamo, pero karon ipakita ko sa inyo ang akon kaayo kag kaluoy.
11
Sa adlaw kag gab-i ang inyo mga pwerta nangin bukas, agod nga ang mga hari sang mga kapungsoran makadala sa inyo sang ila manggad.
12
Pero ang mga pungsod nga wala nagaalagad sa imo malaglag sing bug-os.
13
“Ang kahoy nga pino, ang enebro, kag ang sipres, ang pinakamaayo nga kahoy halin sa mga kagulangan sang Libano, pagadalhon diri sa pagpatindog liwat sa imo, O Jerusalem, sa pagpatahom sang akon Templo, sa paghimo sang akon siudad nga mahimayaon.
14
Ang mga kaliwat sadtong nagpigos sa imo magaabot kag magasaludo sa pagpakita sang ila pagtahod. Ang tanan nga nagtamay sa imo sang una magasimba sa imo tiilan. Pagatawgon ka nila ‘Ang Siudad sang Ginoo,’ ‘Ang Sion, ang Siudad sang Balaan nga Dios sang Israel.’
15
“Indi ka na pagsikwayon kag pagdumtan, isa ka siudad nga ginbayaan kag mamingaw. Himuon ko ikaw nga gamhanan kag matahom, isa ka lugar sang kalipay nga walay katapusan.
16
Ang mga pungsod kag mga hari magatatap sa imo subong sang isa ka iloy nga nagatatap sang iya anak. Mahibaluan mo nga ako, ang Ginoo, nagluwas sa imo, nga ang gamhanan nga Dios sang Israel naghilway sa imo.
17
“Dalhan ko ikaw sing bulawan sa baylo sang bronsi, pilak sa baylo sang salsalon, kag saway sa baylo sang kahoy, kag makaangkon ka sing salsalon sa baylo sang bato. Ang imo mga pangulo indi na magpigos sa imo, himuon ko nga maggahom sila sa katarungan kag paghidait.
18
Ang mga ginahod sang pagpamintas indi na mabatian liwat, ang kalaglagan indi na liwat mag-abot sa imo pungsod. Bantayan ko ikaw kag apinan kaangay sang isa ka pader, dayawon mo ako tungod kay ginluwas ko ikaw.
19
“Ang adlaw indi na mangin-imo kapawa kon adlaw, ukon ang bulan indi mangin-imo kapawa kon gab-i, kay ako, ang Ginoo, mangin-imo kapawa sa walay katapusan, ang kapawa sang akon himaya magasilak sa imo.
20
Ang inadlaw sang imo pagpangasubo matapos na. Ako, ang Ginoo, mangin-imo kapawa nga walay katapusan, nga sobra pa sang sa adlaw kag bulan.
21
Ang tanan mo nga mga pumoluyo magahimo sing matarong, kag magapanag-iya sang duta sa walay katapusan. Ako ang nagbutang dira sa ila, ako ang naghimo sa ila, sa pagpakita sang akon pagkagamhanan sa tanan.
22
Bisan ang imo pinakadiutay kag pinakakubos nga panimalay manginmabakod kag mangin-isa ka gamhanan nga pungsod. Himuon ko ini sa labing madali kon mag-abot ang nagakaigo nga tion. Ako amo ang Ginoo!”
Ilonggo Bible 2012
Maayong Balita nga Biblia Philippine Bible Society, 2012
:
Save Notes