×

現代台語譯本羅馬字版

以賽亞書 61

1
Chì-koân Siōng Chú ê sîn lîm-kàu góa, in-ūi Siōng Chú ēng iû boah góa; I chhe góa khì thoân hó siau-sit hō͘ sàn-chhiah-lâng, i-tī sim-lêng phò-chhùi ê lâng, soan-pò͘ siū-lia̍h--ê tit-tio̍h tháu-pàng, siū-koaiⁿ--ê chhut kaⁿ-lô,
2
soan-pò͘ Siōng Chú un-thāi lâng ê nî kap lán ê Siōng-tè thòe I ê chú-bîn sin-oan ê ji̍t, an-ùi só͘-ū pi-ai ê lâng;
3
tī Sek-an pi-ai ê lâng, I sù in hoa-koan tāi-thòe hé-hu, hoaⁿ-hí ê iû tāi-thòe pi-ai, chheng-chàn ê saⁿ tāi-thòe iu-siong ê sim. In siū chheng-chòe “Kong-gī ê siōng-chhiū”, sī Siōng Chú chai-chèng--ê, beh hián-bêng I ka-kī ê êng-kng.
4
In ōe tiông-kiàn kú-kú pha-hng ê tōe, siu-kiàn chá-chêng húi-hoāi ê só͘-chāi, têng-chài khí-chō sè-sè-tāi-tāi hong-hòe ê siâⁿ-chhī.
5
Gōa-cho̍k-lâng ōe lâi chhī lín ê iûⁿ-kûn, gōa-kok-lâng ōe thòe lín keng-choh chhân-hn̂g, chiàu-kò͘ lín ê phû-tô-hn̂g.
6
Lín beh kiò-chòe “Siōng Chú ê chè-si”, sū-hōng lán ê Siōng-tè. Lín ōe tit-tio̍h lia̍t-kok ê châi-bu̍t, hióng-siū in ê châi-hù lâi khoa-kháu.
7
Lín ū siū-tio̍h siang-pē ê lêng-jio̍k; lâng siūⁿ-kóng lêng-jio̍k sī lín èng-tit ê hūn-gia̍h. Chóng-sī, lín ōe tī ka-kī ê thó͘-tōe tit-tio̍h siang-pē ê sán-gia̍p; lín ê hoaⁿ-hí ōe éng-oán chûn-sio̍k.
8
Góa Siōng Chú ì-ài kong-pêng, iàm-ò͘ⁿ chhiúⁿ-toa̍t kap hoān-chōe. Góa beh ēng sìn-si̍t kā in pò-siúⁿ, beh kap in li̍p éng-oán ê iok.
9
In ê hō͘-tāi tī lia̍t-kok tiong ōe chin chhut-miâ; in ê kiáⁿ-sun tī bān-bîn tiong ū hó miâ-siaⁿ. Só͘-ū khòaⁿ-kìⁿ in ê lâng ōe sêng-jīn in sī Siōng Chú sù-hok ê chú-bîn.
10
Góa ōe in-ūi Siōng Chú tōa-tōa hoaⁿ-hí, in-ūi góa ê Siōng-tè khoài-lo̍k. Siōng-tè ēng chín-kiù chòe saⁿ kā góa chhēng, ēng sèng-lī chòe gōa-phàu kā góa moa; chhin-chhiūⁿ sin-lông tì hoa-koan, sin-niû kòa chu-pó.
11
Tú chhin-chhiūⁿ thó͘-tōe hō͘ chéng-chí puh-gê, chhân-hn̂g hō͘ só͘ iā--ê seng-tióng, Chì-koân ê Siōng Chú ōe hō͘ sèng-lī kap chàn-bí tī bān-kok ê bīn-chêng khui-hoe kiat-chí.
Chinese TTVR
The Bible Society in Taiwan
:
保存笔记