×

Bukuit Ne Tilil 2020

ISAIA 61

1
Mi kobota tamirmirietab Kiptaiyat Jehovah; amu kiila Jehovah si kobiit aamji logoiywek che miach che nyerotin; kigoyokta anya che ilyotin mugulelwek, si kobiit aamji luulenik katiaget, ak kitiach che ratotin.
2
Si kobiit aamda kenyit ne chamat eng’ Jehovah, ak betutab yaaktaetab mugetut ne bo Kamuktaindennyo; ak agaigai tugul che rirtos;
3
si aarorji ichek che rirtos eng’ Sion, kigochi chepkulet ne kararan kogeere orek, ak mwaitab boiboiyet kogeere rirek, ak ngorietab kalosunet kogeere tamirmiriet ne kigonyigisit; si kobiit keguure ketik che bo imanda, che kimin Jehovah, si kegonyit.
4
Ak koteech kogeny karatwek che bo keny, koteech kole kiga koguber eng’ tai, ak koteech kogeny nganasok che kigemeto, ole kiga koguber eng’ ibinwek che chang’.
5
Ak kotononso toek koyaga akwotisiekab kechirekwok, ak kobatwok mbarenik kipsagarek, ak koek ribikab sabibukwok.
6
Ago kiguurenok tisiikab Jehovah: kuurenok bik kiboitinikab Kamuktaindennyo: oame magornatosiekab bororiosiek, ak olosunege torornatenywa.
7
Onyoru konyil aeng’ agobo kalilaneng’wong’; ak koboiboitu eng’ kebebertanywa kogeere toiyet: nyabani anyun ichek konyil aeng’ eng’ emenywa: bunjin ichek boiboiyet ne bo koigeny.
8
Amu achame ane Jehovah kiruoget, aweche rebisiet koboto tengekto; ak ayaakyini ichek eng’ imanit, ak kiyomisyige ak ichek kayomiset ne bo koigeny.
9
Ak konaak iyotenywa eng’ bororiosiek, ak konaak lagokwak eng’ bik: ak naei bik tugul ichek ye keer, kole, Chu iyotet ne kigoberur Jehovah.
10
Abaibaitu mising’ eng’ Jehovah, boiboitu sobondanyu mising’ eng’ Kamuktaindennyu; amu kagolaakwa ngoroikab yetunet, kagotugena ngoriet ne bo imanda, ko u ye lelesane sandet kit ne indoi metit, ak ko u ye lelesane mureret sonoekyik.
11
Amu ko u ye ing’atos tuguk eng’ ng’ony, ak ko u ye bitos tuguk che kigigolji mbar; kobiti ko u noto Kiptaiyat Jehovah imanda ak kalosunet eng’ taitab bororiosiek tugul.
Kalenjin Bible 2020
God's word open for all Bible Society of Kenya, 2020
:
Save Notes