×

Ika Bible 2018

Azaya 62

1
Makẹ Ọrịrịmma Zayọnụ, agbakọ m nkịtịn; makẹ Ọrịrịmma Jerusalẹm, ekpumẹkọ m ọnụ — d'e runi ihiẹn a rịn'a mma hụn pụha ifọn; d'e runi nzụọpụha a e nwunrun kẹ ukpẹ-ọwa.
2
Alị ndị ọzọ k'a hụn n'ọ rịgụọn'ị mma; ndị-nze ile k'a hụn ọghọ ị. Wẹ k'a kpọma ị ẹfan ọhụn hụn Osolobuẹ k'e gi ọnụ a gụn ị.
3
Ị k'a wụrụ okpu-eze hụn ma mma ẹka Osolobuẹ; ị k'a wụrụ okpu-isi ndị-nze ọb'ẹka Chuku i.
4
Akpọkọzị wẹ i “Onyẹ wẹ gbatọ” mọbụ kpọzị alị ị “Alị wẹ jụ.” Kama wẹ k'a kpọma ị “Ihiẹn ẹ sụọ m,” kpọma alị ị “A lụgụọ w'a;” makẹni ihiẹn i k'a sụọ Osolobuẹ, makẹni Osolobuẹ k'a lụmazị alị ị.
5
Kẹ okorọbịa e mẹ nwagbọọ ọ rị a lụ, ẹrịra kẹ mmụ ị ikẹnnyẹ k'a dọn mẹ i; kẹ obi dọn a sụọ okẹnnyẹ rị a gba ẹhụhụọ ụsụọ makẹ nwunyẹ ẹ, ẹrịra kẹ obi k'a gha a sụọ Chuku i ụsụọ makẹ yụ.
6
Jerusalẹm! E bugụọ m ndị-nche che elu mgbọn i; akpọkubehikọ wẹ m, kẹ uhinhin kẹ efinaị. Ụnụ ndị a kpọku Osolobuẹ, ezukwọlẹ ni ikẹn;
7
anịkwọlẹ n'a zu ikẹn d'e ru n'o mẹgụ Jerusalẹm turu ọhụnma, mẹ ẹ wụrụ ihiẹn ụwa ile a ja mma.
8
Osolobuẹ e kunọlẹ ẹka-ihiẹn ẹ, ẹka a hụn a kpa ikẹn, sị, “Onwọnzini ogẹn m'e gi bu ihiẹn-ugbo ị rụn ye ndị iṅẹnrẹn i ri; onwọnzini mgbe ndị alị ọzọ e gi narịn ị manya-ọhụn ị ta afụnfụn a,
9
Mba; ndị hụn ghọn'a k'e ri ẹ, ja Osolobuẹ mma; ndị hụn tụtụ ogbe-vaịnị nwọn ra manya a imẹ ezi-ọgwa ụlọ-nsọ m.”
10
Pụha nị! Ghashi ni ọnụ-mgbọn hụ pụha!! Kwa nị nị ndị alị ụzọ! Rụn n'a! Rụntọ nị ụwaya! Wepụsọnmẹ ni ọmụma ndị hụ! Weshi ni ahịma elu nị ndị alị ichẹn-ichẹn bịa.
11
Osolobuẹ a hịgụọ a ghagbama ụwa ile, sị, “Sị nị obodo Zayọnụ, ‘Lẹhụ Onyẹ-nzụọpụha ị k'ọ lala! Lee ụmụ ị ọ kịla n'o gi hụhụ ị; ya lẹ ihiẹn ọ rụnpụha wị lala.’ ”
12
Wẹ k'a kpọ wẹ “Ndị-nsọ, ndị Osolobuẹ gbapụha;” wẹ k'a kpọ yụ nwẹn wụ obodo Zayọnụ, “Obodo w'a chọ achọ, obodo wẹ Latọlẹni.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes