Ŋuni n-lee yi Bɔzira din be Ɛdom tiŋgbɔŋ ni n-ye binyɛr’ ʒee kanna ŋɔ? Ŋuni n-lee ye binyɛr’ viɛlli n-kanna ni yiko ni o kpiɔŋ ŋɔ? Yawɛ ŋun mali yiko ka ni tooi tiligi niriba la n-kanna ni o ti mol’ o nasara dibu la molo.
Ka Yawɛ garigi yɛli, “N nɔrila zuliya kam niriba kaman wain tiwala la, ka so bi sɔŋ ma. Ka n daa no ba ni suli mini suhuyiɣisili, ka bɛ ʒim varim m binyɛrigu ka di gabisi zaa.
N ni yɛli Yawɛ yurilim maŋli la yɛla. O ni tum tuun’ kar’ shɛŋa ti ti la zuɣu, n ni paɣ’ o. O nambɔzɔbo min’ o yurilim maŋli la zuɣu, o niŋ alibarika pam niŋ Izraɛlnim’ ni.
bɛ muɣisigu zaa ni. Pa malaika ka o daa tim na, amaa ŋun’ Yawɛ maŋmaŋa n-daa tiligi ba. O nambɔzɔbo min’ o yurilim zuɣu ka o daa tiligi ba. Ŋuna n-daa pun gbib’ ba piligu ni ha.
Di saha ka bɛ daa teei Yawɛ dabili Musa ʒiɛman’ la yɛla ka bɔhira, “Yawɛ ŋun daa tilig’ o niriba toondaannim’ teeku ni la lee be ya pumpɔŋɔ? Yawɛ ŋun daa zaŋ o shia kasi ti Musa la lee be ya?
A ni be alizanda ni a biɛhigu shee din be kasi ka mali jilima ŋɔ, lihim’ na nya. A baɣa ni daa yi be ti ni shɛm ni a yiko la lee kpalimla ya? A yurilim min’ a nambɔzɔbo la lan kani zaŋ kana ti sani.
Bɔ n-niŋ ka a chɛ ka ti birigi ka chɛ a soli? Bee bɔ n-niŋ ka a chɛ ka ti niŋ tipawumli n-zo a sani? Labimi ti sanna, ninvuɣ’ shɛb’ bɛn nyɛ a daba la mini zuliya shɛb’ bɛn nyɛ a niriba la zuɣu.