×

NTETO INJEGA CIA 2018

Isaya 64

1
Kaaba ûtûrîte îgûrû ûkeenama gûkû nthîgûrû, irîma bigateetema.
2
Ta ûrîa mwanki jûtaambaga jûgwete kîthaka, kana ta ûrîa mwanki jûtûmaga rûûjî rûtherûka, kaaba ûtûme anthû baaku bamenye gwe ûrî û; weeja mîgongo yonthe îkainaina yakwona.
3
Rîrîa ûthithagia mantû ja kûrigaria tûtîîrîgîrîte, wînamaga nthî, irîma bigateetema.
4
Kuuma kîambîrîria mwanka nandî tûrî, gûtaigîîwua kana kwonekana Mûrungu ûngî taagwe, ûteethagia barîa baamwîtîkîtie.
5
Barîa bagwîragîrua kûthithia mantû jarîa jaagîrîte; barîa batîûragîrua nî ûrîa gwe wendaga bakaraga mîtûûrîreene yaao; gwe nî ûboonagia wega bwaaku. Nî twijî atî tuî nîtweeîrie, naagwe ûrathûûra. Tûkarîte meeyiene jeetû îgiita rîrîraaja mono, nandî tûtîkûmenya këethîra woomba gûtwonokia.
6
Twinthe tûkari ta antû barî na mûgiro; tûkinyangîte mathithio jarîa jonthe twathithia ja waagîru mwanka jaatiga kwonekana ta nguû întuku nî rûko. Twinthe tûnyaarîte twoomagara ta mabûûra, najo meeyia jeetû jatuurutaga ta ruuo jagatûta kûraaja.
7
Gûtî we ûkûthaathagia; gûtî we ûririkanaga gûkûromba ûteethio, nîûntû gwe nî waatwiciithîîre na ûratûrekanîîria na meeyia jeetû.
8
Îndî amwe na bûu, gwe MWATHANI nîgwe Baaba weetû. Tuî tûrî mûthetu jwa yûmba, naagwe nîgwe mûtûûmbi; twinthe tûrî yûmba rîa njara ciaaku.
9
Tiga kûthûûra mono gwe MWATHANI, kana ûtûûra ûririkanaga meeyia jeetû mwanka kenya. Itû twigîîrue kîaao, nîûntû twinthe tûrî antû baaku.
10
Ntûûra ciaaku irîa wathûrîte nî ciaeere ithaka; Zaiûni nî rwanda rûrûtheri; Jerusalemu nî îgaanjo.
11
Kîûrû gîeetû gîkîtheru na gîkîthongi, kûrîa biûjûjû bieetû biagûkumithagîria nî kîaîîthîrue na mwanki, ningî gûntû gwetû kunthe kûrîa kwaarî gûkûthongi mono nî kwamomorangîrwe.
12
Kinya mantû jakari ûu itû MWATHANI woomba kûrega kûthithia noo atîa? No wîte na mbere gûtûkirîra na gûtûkanûkia nkûrûki?
Songe Bible 2018
KIMERU BIBLE WITH DC Bible Society of Kenya, 2009, 2018
:
Save Notes