|
| 1 |
|
| Tatitux siwa: “Khitinakatix jan kunsa mayipkitänxa ukanakaw nayan ukarux jutapxi; khitinakatix jan thaqhapkitänxa ukanakaw nayarux jikxatapxitu. Kawkïri markatix nayar jan art'asinkitänxa, uka markaruw ‘Nayax akanktwa’ saraktxa. |
|
| 2 |
|
| Mä uru phuqhatarakiw amparax luqatatat jikxatasta, nayatak sayt'asir markar katuqxañataki, uka markasti jan wali thakhinjam sararaki, pachpa amtatanakapar arkasa. |
|
| 3 |
|
| Uka markax nayarux ñanqhachapunituwa; k'ari diosanakaruw wilañchanak luqtaski, ladrillot lurat altaranakxan incienso q'uphicharaki. |
|
| 4 |
|
| Uka markax amay imat patanakan qunupxi, arumanakas jamas p'iyanakan qharapxi, jiwatanakar yupaychañatakiw ukankapxi; khuchhi aycha manq'apxi, phukhunakaparusti k'ari diosanakar luqtat manq'anakampiw phuqhantapxi. |
|
| 5 |
|
| Sapxarakiwa: ‘Ukar qhiparam, jan jak'achasistati, nanakax Diosan qullan ajllit markapäpxtwa’ sasa. Uka jaqinakax uru phuqhat nakhir ninar uñtatäpxiwa; nasatsa jiwq'ipax ch'isintayarakituwa. |
|
| 6 |
|
| Taqi ukanakasti naya nayraqatan qillqatawa, janirakiw ukhamak qhiparkäti; jan ukasti, mutuyapunïwa. |
|
| 7 |
|
| Uka markarux kunayman ñanqha juchanak luratapat mutuyä. Nayarux walpun chuyma ust'ayitu, jach'a qullunakana, jisk'a qullunakana k'ari diosanakar incienso q'uphichapxatapata. Ukat kunjämtix wakiski mutuyañax ukham mutuyarakï.” Kuntix arskta uk phuqhapunïwa. |
|
| 8 |
|
| Tatitux siwa: “Kunapachatix uvanakax suma puqurt'atäki ukkhax jaqix janiw maysa jalaqtaykiti, ukhamat walja vino apsuñataki. Ukhamarakiw nayax luqtirinakaxar munasitax laykux janiw taqinir tukjkäti. |
|
| 9 |
|
| Israelampi, Judämpix walja wawanakanïpxaniwa, jach'a qullunakani, jisk'a qullunakan uraqin jakasipxani. Ajllitanakax uraq katupxani, luqtirinakaxasti ukan jakapxarakini. |
|
| 10 |
|
| Sarón sat qhirwax uywanakampi phuqt'atäniwa, Acor sat qhirwansti uywanakax sum manq'art'asipxani, uka uywanakax nayar arkir markaxankiwa. |
|
| 11 |
|
| Ukampis jumanaka, khitinakatix Tatitut jayarst'apkta, qullana qulluxatsa armasipxta, Gad, Mení siski uka qamir yänak churiri diosanakaruw manq'sa, vinsa churapxarakta, |
|
| 12 |
|
| jichhax jumanakarux jan walt'añakiw suyt'apxtam; espadampi jiwarayatäpxätawa. Nayax jumanakaruw jawsapxsma, jumanakasti janiw ist'apkistati; arxayapxsmawa, janirakiw ist'apkistasa; kuntix nayax jan munktxa uk lurapxtaxa, kuntix nayarux jan kusisiykitu uk ajllipxaraktaxa. |
|
| 13 |
|
| Ukatpï Tatitux sixa: “Luqtirinakaxax manq'añanïsipkaniwa, jumanakasti janiw manq'añanïpkätati; luqtirinakatakix umañax utjaskaniwa, jumanakasti umat pharjataw sarnaqapxäta; jupanakax kusisitäpxaniwa, jumanakasti mä p'inqa jisk'achjataw uñjasipxäta; |
|
| 14 |
|
| jupanakax kusisiñat q'uchusipxani, chuymanakapan kusisiñ utjatap layku, jumanakasti chuyma p'akintataw ayqupxäta, jach'at wararipxarakïta. |
|
| 15 |
|
| Nayan ajllitanakaxarusti suma suti churä; ukampis jumanakan sutinakamasti mayninakar ñanqhachañatak aytatäniwa. |
|
| 16 |
|
| Khititix aka markan askinak katuqañ munanixa, chiqa aski Tatituruw mayini; aka markan mä juramento luriristi, chiqa aski Diosan sutipxaruw lurani. Nayra t'aqhisïwinakasti armatäxiwa, nayraqataxatsa chhaqtxarakiwa. |
|
| 17 |
|
| “Uñtapxam, nayax mä machaq alaxpachampi, mä machaq uraqimpi lurä. Kunatix utjkän ukax armatäxaniwa, janiw khitis ukanakat amtaskxaniti. |
|
| 18 |
|
| K'uchirt'asiñamp wiñayatak phuqhantasipxam, kuntix nayax lurkä ukat kusisipxam, nayasti mä kusiskañ Jerusalén marka lurä, uka markan jakir jaqinakasti k'uchikïpxaniwa. |
|
| 19 |
|
| Naya kipkaw Jerusalenat kusisï, markaxar uñjasinsti kusisirakïwa. Jachañax ukan janiw utjkxaniti, janirakiw llakisiñat ayquñas utjkxaniti. |
|
| 20 |
|
| Wawanakax ukan janiw jisk'pach jiwarapkaniti, janirakiw chuymani jaqinakas janïra maranakap phuqkasax jiwapkaniti. Patak marani jiwañasti, waynpach jiwañäniwa, janïra patak mara phuqkas jiwañasti mä ñanqhäniwa. |
|
| 21 |
|
| Jaqinakax utanak utachasipxani, ukan jakasipxani, uvanak yapuchasipxani, uka yaput manq'asipxani. |
|
| 22 |
|
| Janiw ukan maynix yaqhan jakasiñapatak utachkaniti, janirakiw maynix yaqhan askipatak yapuchkaniti. Markaxax mä quqar uñtata walja maranakaw jakasini; ajllitanakaxasti kuntix amparapampi lurasipki ukat manq'asipxani. |
|
| 23 |
|
| Janiw inamayak irnaqapkaniti, janirakiw wawanakapas jisk'pach jiwarapkaniti, Tatituw jupanakarusa, wawanakaparusa, allchhinakaparus suma waxt'asiñap churani. |
|
| 24 |
|
| Janïraw jupanakax jawsapkitaniti, ukkhax niyaw nayax jupanakar jaysä; janïraw parlañsa tukuyapkaniti, ukkhax niyaw jupanakar ist'ä. |
|
| 25 |
|
| Qamaqimpi, ovejampisti mayakiw manq'asipxani, leonasti vacar uñtataw chhuxlla manq'ani, kataristi laq'a manq'arakini. Nayan qullan qulluxansti janiw khiti ñanqha luriris utjkaniti.” Tatituw ukham arsu. |
|
|
|
|