Ég lét þá leita svara hjá mér sem ekki spurðu og lét þá finna mig sem ekki leituðu mín. Ég sagði: „Hér er ég, hér er ég,“ við þjóð sem ákallaði ekki nafn mitt.
Þeir segja: „Vertu þar sem þú ert, komdu ekki nærri mér því að ég er of helgur fyrir þig.“ Slíkir menn eru reykur í nösum mínum, eldur sem brennur liðlangan daginn.
bæði fyrir sekt þeirra og sekt feðra þeirra, segir Drottinn. Þeir brenndu reykelsi á fjöllum og smánuðu mig á hæðunum. Ég mun gjalda þeim eftir verkum þeirra og endurgjalda í skaut þeirra.
Svo segir Drottinn: Þegar menn finna safa í vínberi segja þeir: „Skemmdu það ekki því að í því er blessun.“ Hið sama mun ég gera fyrir þjóna mína til að tortíma þeim ekki öllum.
yður ofursel ég sverðinu. Þér verðið allir að krjúpa til aftöku því að ég hrópaði en þér svöruðuð ekki, ég talaði en þér hlustuðuð ekki heldur gerðuð það sem var illt í augum mínum og völduð það sem mér þóknaðist ekki.
Þess vegna segir Drottinn Guð svo: Þjónar mínir munu eta en yður mun hungra, þjónar mínir munu drekka en yður mun þyrsta, þjónar mínir munu gleðjast en von yðar mun bregðast.
Sá sem óskar sér blessunar í landinu óski sér blessunar í nafni hins trúfasta Guðs og hver sem vinnur eið í landinu, hann vinni eið í nafni hins trúfasta Guðs þar sem fyrri þrengingar eru gleymdar og huldar fyrir augum mínum.
Þar verða ekki framar börn sem aðeins lifa fáa daga eða öldungur sem ekki nær fullum aldri en sá sem deyr tíræður telst ungur og sá sem ekki nær tíræðu verður talinn bölvaður.
Þeir munu ekki erfiða til einskis og ekki eignast börn sem deyja fyrir tímann því að þeir eru niðjar þeirra sem Drottinn hefur blessað og börn þeirra með þeim.
Úlfur og lamb verða saman á beit, ljón mun bíta gras eins og naut og mold verða fæða höggormsins. Hvergi á mínu heilaga fjalli munu þau vinna mein né gera skaða, segir Drottinn.