Lalpa chuan heti hian a ti: “Ka inpeih reng a, min râwn duh si lo va, Hmuh mai theih ka ni a, min zawng duh bawk si lo. Ka mi, ka hming lam duh lote hnênah chuan ‘Heta hi ka awm reng alâwm,’ ka ti a.
An sualna chu, an thlahtute sual nên, Anmahni chungah ka thungrûl dâwn. Tlângahte chuan rimtui an hâl ṭhîn a, Mualahte chuan min hmuhsitzia an lantîr ṭhîn. An thil tih ṭhin avângte chuan Hremna, an chunga tla tûr chu, ka teh zo tawh.”
Lalpa chuan heti hian a ti: “Grep la ṭha chu tu man an paih mai mai ngai lo, Uain-ah an siam zâwk ṭhîn. Ka chhiahhlawhte pawh hi an zavai chuan Ka tiboral bîk lo vang.
Jakoba leh Juda thlah aṭangin Ka tlâng thianghlim luah tûr mi ka ruat ang, Ka tlângte chu an luah ang a, Tah chuan ka chhiahhlawhte an chêng reng dâwn a ni.
In tuar tûr khawrêl chu khandaiha thih a ni, Talhtu hmaah in la kûn vek ngei ang. Hêng mite hian ka koh laiin min chhâng lo va, Ka duh loh zâwng sual an ti a, Ka sawi laiin an ngaithla bawk hek lo, Ka lâwm loh zâwng tih an thlang ṭhîn.”
Lalpa Pathian chuan heti hian a ti: “Ka chhiahhlawhten ei tûr an ngah ang a, Nangni in ril a ṭâm hle ang. Ka chhiahhlawhten in tûr an ngah ang a, Nangni in tui a hâl si ang. Ka chhiahhlawhte an hlim ang a, nangni in zak thung ang.
Ka thlan, ka mite chuan in hmingte chu ânchhia atân an hmang ang a, Kei, Lalpa Pathian ngei hian ka tihlum ang che u. Ka chhiahhlawhte erawh chu an hming ka sa thar ang.
Ram chhûnga mi, malsâwmna dîl apiangte chuan, Pathian, rinawma malsâwmna an dîl ang a, Ram chhûnga mi, chhechham duh apiangin Pathian rinawma hming chhâlin an chham ṭhîn ang. Tûn hmaa buainate a liam ta a, Ka hmuh phâk loh tûrah an awm zo ta.
Hlamzuiha thi an awm tawh lo vang a, Tarkûna khûp bihin an dam tawh ang; Kum za dam zo lo chu, ‘vâng laia thi,’ an ti ang a, Mi sual kum za dam zo lova thi chu ‘ânchhia a dawng a ni,’ an ti bawk ang.
An in sak chu mi dang luah tûr a ni lo va, An grep phun chu mi dang ei tûr a ni hek lo, Ka mite chu hai tarin an dam ang a, Ka thlante chuan an thawh rah chu, Tarkûn thlengin an tlân ngei ang.
Chinghnia leh berâmno an tla dûn ang a, Sakeibaknei pawhin bâwng ang maiin buhpâwl a ei ang a, Rûlte pawhin chawah vaivut an ring bawk ang. Ka tlâng thianghlimah chuan Thil ṭha lo leh intihnat rêng a awm lo vang,” Lalpan a ti.