PAPA GƆD se, Ɔl dɛn tin ya na mi mek dɛm, so ɔl dɛn tin ya na mi yon. Bɔt na dis kayn man a go luk to, man we ɔmbul ɛn de ripɛnt ɛn de trimbul we dɛn yɛri mi wɔd.
“Di pɔsin we de kil kaw na lɛk pɔsin we kil mɔtalman; pɔsin we de sakrifays ship pikin na lɛk udat brok dɔg nɛk; pɔsin we de mek sid ɔfrin na lɛk pɔsin we de sakrifays ɔg blɔd; pɔsin we de mek sakrifays wit insɛns fɔ mɛmba wetin bin dɔn bi, na lɛk pɔsin we de blɛs lay lay gɔd. Dɛn dɔn pik dɛn yon we, we dɛn want fɔ de, dɛn sol de gladi fɔ du dɛn bad bad tin dɛm we PAPA GƆD nɔ lɛk.
Misɛf igen go pik siknɛs ɛn waala fɔ dɛm ɛn mek di tin dɛn we dɛn de fred, mit dɛm; bikɔs, wɛn a bin kɔl dɛm, nɔbɔdi nɔ ansa, wɛn a bin tɔk, dɛn nɔ lisin; bɔt dɛn du tin dɛn we ivul na mi yay.”
Una yɛri PAPA GƆD in wɔd yu we de trimbul we yu yɛri in wɔd: ‘Yu brɔda dɛn we et yu ɛn trowe yu na do fɔseka mi nem dɔn se, “Lɛ PAPA GƆD tek glori so dat wi go si se yu gladi’; bɔt na dɛn go shem.
Udat dɔn yɛri tin lɛk dat wande? Udat dɔn si tin lɛk dat wande? Kɔntri go mek insay wande? Dɛn go ebul mek wanol neshɔn insay wan minit? Bikɔs as Zayɔn go into lebɔ so I bɔn in bɔypikin dɛm.
Bikɔs na di PAPA GƆD se; “A de tɛl una, a go mek prɔspɛriti go to am lɛk riva, ɛn di neshɔn dɛn jɛntri go to am lɛk riva we de ova flo; ɛn una go sɔk, ɛn i go tot una nain fut ɛn mek una dans nain ni.
PAPA GƆD se, ɔl dɛn wan dɛn we de mek dɛnsɛf klin na dɛn lay lay gɔd dɛn yay fɔ go insay dɛn gadin, de it ɔg bif, dɛn insɛkt dɛn we de pwɛl fam ɛn arata, go day togɛda.
Ɛn a go put wan sayn to dɛn. Ɛn a go sɛn di wan dɛn we nɔ day pan dɛn go na difrɛn neshɔn dɛm, dat na Tashish, Tubal ɛn Javan, to dɛn fa fawe kɔntri dɛn we de nia si, ɛn nɔ yɛri bɔt mi yet ɛn nɔ si mi glɔri yet; na dɛn go go tɛl dɛn bɔt mi glɔri.
Ɛn dɛn go briŋ ɔl una brɔda dɛn kɔmɔt na ɔl di neshɔn dɛm lɛk ɔfrin to PAPA GƆD, pan ɔs ɛn pan chariɔt dɛm, insay Karavan ɛn pan dɔŋki ɛn kamɛl go na mi oli mawnten Jerusɛlɛm, jɛs lɛk aw di Izrɛlayt dɛn de briŋ sid ɔfrin na klin plet na PAPA GƆD in os. Na so PAPA GƆD se.
“Ɛn dɛn go kɔmɔt go, go luk di man dɛn we tɔn dɛn bak pan mi dɛn dedebɔdi dɛm; bikɔs dɛn tumbu nɔ go day, dɛn faya nɔ go ɔt. Nɔbɔdi nɔ go gladi fɔ si dɛm.