Á dögum Akasar, konungs í Júda, Jótamssonar, Ússíasonar, héldu Resín, konungur í Aram, og Peka Remaljason Ísraelskonungur upp til Jerúsalem til að ráðast á borgina en gátu ekki unnið hana.
Þegar húsi Davíðs var tilkynnt að Aramear hefðu náð fótfestu í Efraím skalf hjarta konungs og hjarta þjóðar hans eins og skógartré skjálfa fyrir vindi.
Þá sagði Drottinn við Jesaja: „Gakktu með son þinn Sear-Jasúb að efri enda vatnsleiðslunnar úr efri tjörninni, við götuna út á þvottavöllinn, til móts við Akas
og segðu við hann: Gættu þín, haltu ró þinni, óttastu ekki. Láttu ekki hugfallast fyrir þessum tveimur hálfbrunnu sprekum, fyrir brennandi reiði Resíns, Arams og sona Remalja.
Drottinn mun senda yfir þig, þjóð þína og fjölskyldu þvílíka daga að aðrir eins dagar hafa ekki komið síðan Efraím skildist frá Júda − hann mun senda Assýríukonung.“
Á þeim degi mun Drottinn raka bæði höfuð- og skapahár með rakhníf sem hann leigði handan fljóts − með Assýríukonungi − hann mun jafnvel raka skeggið burt.