Ri Rezin ajawinel re Siriy, xukuje' ri Pek ajawinel re Israel, u c'ojol ri Remaliy, xech'ojin ruc' ri Jerusalen, are ta xcaj xquich'äco, man c'u xecuin taj. Xc'ulmataj wa' aretak pa tak ri k'ij aretak ri Acaz, u c'ojol ri Jotam, ri' u mam c'ut ri Uziy, are' ajawinel pa Juda.
Pa we k'ij ri' xeyok we tzijol ri' che ri Acaz xukuje' chque ri e ralaxic: “Ri e aj Siriy qui junamam qui wäch cuc' ri aj Eprain.” Ri ajawinel xukuje' ri winak xquichaplej birbitem jacha' ri cäquiban ri che' pa ri c'ache'laj aretak cäjich'ich' ri quiakik'.
Xubij c'u ri Ajawaxel che ri Isaiy: “Chac'ama' ri a c'ojol Sear-jasub, jät, jarika' ri ajawinel Acaz chuchi' ri u be ja' ri coc chupam ri nimalaj colobal ja' ri cäch'aj wi atz'iak,
chabij c'u che: ‘Chatoc il, maxe'j c'u awib; mawi muban quieb a c'u'x chque we quieb u tza'm tak si' ri' ri quebukuwic, ri Rezin e rachil ri aj Siriy xukuje' ri u c'ojol ri Remaliy, ri cätajin quenicow ruc' coyowal.
Ri Damasc are nim tinimit aj Siriy, xukuje' ri Rezin are rajawinel ri Damasc ri Samar are nim tinimit aj Eprain, are c'u ri u c'ojol ri Remaliy are rajawinel ri Samar pa oxc'al job junab (65) ri Eprain cutanaba' ruxic nim tinimit; we ri ix man c'o ta jun i cojonic ri co c'olic, xukuje' man co ta quixtaq'ui' canok.’ ”
Xubij c'u ri Isaiy: “Chitatabej, ix ri ix aj ajawinelab ri ix aj uwo rachoch ri David. ¿La man nim ta quiwil wi chi quiya' latz' chque ri winak chi xukuje' quiwaj quiya' latz' che ri nu Dios?
Ri Ajawaxel cuc'am na ulok pawi', puwi' ri a tinimit xukuje' puwi' ri rachoch ri ajawinel, k'ijol ri mawi jumul e c'ulmatajinak canok aretak ri Eprain xutas rib chrij ri Juda.” (Che ri ajawinel ri Asiriy cäbix wi wa'.)
Pa ri k'ijol ri' ri Ajawaxel cuban na chi quepetic e jacha' ri amalo ri e jekel chuchi' ri najalaj nima' aj Ejipt, xukuje' cuban na chi quepetic jacha' usmacab ri e jekel pa Asiriy.
Conojel c'ut quekaj na puwi' tak ri k'ayes xukuje' pa tak ri jul xo'l tak ri abaj, pa conojel tak ri ulew ri e q'uiyinak wi q'uix xukuje' pa tak ri c'olbal jawije' cäquitij wi qui joron ri wacax.
Pa ri k'ij ri' ri Ajawaxel cucoj na ri rajawinel ri Asiriy jacha' jun nawanxo kajom ulok c'ä jela' che ri nima' Euprats, cuban na tol che ri qui jolom xukuje' cujos na ri quismachi' conojel ri aj Israel xukuje' ri rismal ronojel ri qui cuerp.
sibalaj q'ui ri u leche cac'oji' na ruc' chi cäcuinic cutij leche u tzacom rib. Conojel c'ut ri queto'taj canok aretak cäsachisax u wäch ri ulew, ri man quecäm ta aretak cäwulix ri tinimit, cäquitij na leche u tzacom rib xukuje' juyubal räx cab.
Xuwi cuya' coc jun chila' ruc' q'uiakbal ch'ab che qui cämisaxic chicop cuc' ch'ab, ronojel c'u ri ulew cux na u q'uiyibal q'uix xukuje' juyubal tak k'ayes.
Ri u wi' tak juyub ri quetajix nabe ruc' asaron, cänoj na chque q'uix xukuje' juyubal tak k'ayes, man c'o ta chi jun craj copan ta chila'. Xuwi cajwataj na che yuk'bal wacax xukuje' chij.