1
Ñanderuete he’i chéve: Eiporavo peteĩ itapeguasu, ha ehai porã hese ko’ã ñe’ẽ: Maher-salal-hasbaz.
2
Ha agueru chendive techahare ramo pa’i Uríaspe ha Zacarías, Jeberequías ra’ýpe.
3
Ha upéi aiko che rembireko, pe profetísa ndive, ha ou hyeguasu, ha imemby peteĩ mitãkuimba’e. Ha Ñanderuete he’i chéve: Embohéra Maher-salal-hasbaz, he’iséva: Pya’e omonda ha pya’e ogueraha hesekuéra ija’e’ỹva mba’e ñorãirõ megua.
4
Pe mitã he’ikuaa mboyve: Che ru térã che sy, ojepe’áta Damásco mba’erepyeta ha Samária mba’erepyeta ojegueraha hag̃ua Asíria retã ruvicha rendápe imba’erã ramo.
5
Ha Ñanderuete oñe’ẽ jevy chéve, ha he’i:
6
Ko’ã tetãygua ko’ãva ndojapóigui mba’evérõ Siloe pegua y, osyry mbegue katúva, ha ou ovy’a hag̃ua Rezin ha Remalías ra’y ndive;
7
pema’ẽ porãke, upévare Ñanderuete omboúta hi’ári y hatã osyrýva, kóva ha’ehína Asíria retã ruvicha mbaretekue (isoldádo atyguasu), ha péva ohasapáta umi ysyry ha hembe’ykuéra rupi;
8
og̃uahẽvo ojaho’íta Juda retãme ha ohasapáta tenonderãve gotýo, ha hi’y og̃uahẽta ijahy’o peve; ha oipysóta ipepokuéra omyenyhẽ hag̃ua ne retã tuichakue, angái Emanuel (he’ise Ñanderuete oĩ ñanendive.)
9
Peẽ tetãnguéra pejeity ramojepe hi’arikuéra peñemyangekõi hag̃ua; pehendu opaite tetã mombyryguáva ha pejeku’akua porã ramojepe peñemyangekõita; peñembosako’i porã ramojepe peñemyangekõipáta.
10
Peñeha’ãmba ramojepe pembopoguy hag̃ua, ndoikomo’ãi katu pe mba’e peipotáva, Ñanderuete oĩgui orendive.
11
Ñanderuete chejoko hatã ipo mbaretépe ha cherekombo’e porã ani hag̃ua aguata ko’ã tetãygua rape rupi, ha he’ive:
12
Ani pejétei ñembotavy, ko tetã kóva oñembohéra ramojepe ñembotavy; ha ani pekyhyjétei umi mba’e ha’ekuéra okyhyjévagui, aníke peñemondýi.
13
Pejeroviánte yvága atykuéra Járare, ha peñemondýi ha pekyhyjeva’erã ichugui.
14
Ha’e katuete oipytyvõta umi ojeroviávape hese; umi mokõi Israel rógagui oikóta ita ñepysãngaha ramo ha Jerusalenguakuérape g̃uarã ñuhã ha mombe ramo.
15
Ha heta ijapytépe oñepysãngáta, ho’áta ha iñangekõi joáta; ha oñemosãmbáta ha ojegueraháta jepokuapýpe.
16
Eñongatu porãke che ñe’ẽ ha ehechauka che remimbo’ekuérape.
17
Che aha’ãrõse Ñanderuetépe, Ha’e oñomi ramojepe hova Jacóbo rógagui, upeichavérõ jepe ajeroviase hese.
18
Peikuaa porãke, Ñanderuete oipota che ha che ra’ykuéra, Ha’e ome’ẽmava’ekue chéve, roiko mba’e techaukaha ramo Israélpe g̃uarã ha rohechauka yvága atykuéra Jára oikoha Jerusalen cérrope.
19
Ha oje’e ramo peẽme: Pemba’eporandu umi ohenóiva anguépe, umi imba’ekuaávape, ha umi oñe’ẽ guyguývape, upéramo pejéke: Tetãyguakuéra piko nomba’eporandui’arã Ijárape. Omba’eporandu piko umi anguépe kuimba’e ha kuña oikovéva rehe.
20
Umi ojeroviase’ỹva Ñanderuetére ha ndojaposéiva hembiapoukapy katuete naiko’ẽmo’ãi ha Che nañe’ẽmo’ãi hendivekuéra.
21
Koichagua tetã ohasa asýta ha iñembyahyiva’erã, ha iñembyahýi aja ipochyetéta hikuái ha oñe’ẽvaíta hetã ruvicha ha Ijára rehe, omopu’ãta hova yvate gotýo.
22
Upéi oma’ẽva’erã ijyvy rehe, ha péina ápe angekõi ha tatatĩ, pytũ ha jepy’apy vai og̃uahẽta, ha oikóta hikuái pytũ guýpe.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015