×

Ika Bible 2018

Azaya 8

1
Ya kẹ Osolobuẹ nọ sị m, “Weri ibe ụrụa shịanị, n'i gi mkpịnsịn deye ẹ: ‘Gbukpọkẹnrin; Gbukwarị-ozigbo ’.
2
M k'a kpọ onyẹ nchụn-ẹjan wụ Yuria lẹ Zẹkaraya nwa Jeberekia, wẹ ẹbụbụọ a wụrụnị m ndị ọshẹri wẹ k'e gi oku wẹ dọn.”
3
Mmẹ lẹ nwunyẹ m wụ onyẹ-amụma nọ ranhịn, ọ nọ tụrụ imẹ, mụ okẹnnyẹ. Osolobuẹ nọ sị m, “Gụn a: ‘Gbukpọkẹnrin; Gbukwarị-ozigbo’.
4
Nwatanị gini d'a s'ẹka hịma ‘Baba!’ mọbụ ‘Nnẹ!’ eze Asiria e burugụọ akụ-lẹ-ụba Damaskọsụ lẹ ihiẹn hụn alị Sameria gbu ndị ọzọ kwarị.”
5
Osolobuẹ nọzị sị m:
6
“Ebe omẹni ndịnị a jụgụọ m — mmẹ hụn wụ mirin Shilụa hụn e hu ẹkẹrẹ-ẹkẹrẹ, chanma nị Rẹzini ẹnya ya lẹ nwa Rẹmalịa,
7
mmẹ wụ Osolobuẹ e d'e zihẹni wẹ okẹn mirin Iyi Yufretisi eze Asiria lẹ ihiẹn ile o gi nwọn ọghọ. ‘Mirin’ hụ k'e jun, pụ ọnụ ebe ile, hughafe mkpẹnrẹn ẹ ile,
8
huru Juda ile, rukpumẹ ẹ, rudẹ ịhịan olu. Ẹka-nku ẹ k'a shịakpumẹchanrịn alị ị, ịyụ, Imanuẹlụ.”
9
Kokomẹmẹni ni agha-o, ndị alị ile, kanị wẹ k'e gungwọn ụnụ! Gọn ni ntịn, alị ile rịdẹ ebe ụwa ru: Kwademẹ ni agha-o, kanị wẹ k'e gungwọn ụnụ! Kwademẹkwọ nị agha-o, kanị wẹ k'e gungwọn ụnụ!
10
Zu ni umẹ agha ụnụ k'e zu, kanị o k'a kpayịya; tụ nị iroro ile ụnụ k'a tụ, kanị ọ bụnkọ. Makẹni, Osolobuẹ nọyeni ẹnyi anọyeni.
11
Osolobuẹ gi ẹka zeni kwọndọn m, gwa m oku, sị m esọnkwọlẹ ụzọ ndịnị sọnkọ. Ọ sị m:
12
“Ẹlẹkwọ ihiẹn ile mẹni k'i k'a sị ‘ezugụọ wẹ umẹ ẹ’ kẹ ndịnị dọn e ku; atụkwọlẹ egun ihiẹn wẹ rị a tụ egun ẹ; amalẹ piripiri.
13
Osolobuẹ Hụn nwọn ikẹn ile sụọ k'a rị ụnụ nsọ ẹnya, ịya k'i k'a tụ egun ẹ; ịya wụ onyẹ i k'a manị piripiri,
14
o k'a wụ ebe rị nsọ w'a gbaban; kanị, ọmụma ịhịan a kpọgburu lẹ nkumẹ e mẹ wẹ a dan k'o k'a wụrụnị azụụn ẹbụbụọ rị Izrẹlụ. Nke ndị bi imẹ Jerusalẹm, ọnyan lẹ ihiẹn w'e gi kwọndọn wẹ k'o k'a wụrụnị wẹ.
15
Imẹrinmẹ wẹ k'a kpọgburu; wẹ k'a dan, dangungwọn, wẹ k'e shini wẹ ọnyan, nwụndọn wẹ.”
16
Bu oku ndịnị k'a shịa ẹri dọnmẹ, we ihiẹn ndịnị m rị a kuzi ye ndị rị e sọnni m dọnmẹ.
17
M jẹnkọ d'e cheri Osolobuẹ, hụn rị e zuemẹni ikpụnọ Jekọpụ ihun ẹ. M jẹnkọ d'e gi ẹ e dọn ẹnya.
18
Lee m ebeni, mmẹ lẹ mmụ Osolobuẹ ye m. Ẹnyi wụ ahịma lẹ ihiẹn Osolobuẹ Nwọn ikẹn ile gi a gwa Izrẹlụ oku, Osolobuẹ hụn bi Ugu Zayọnụ.
19
Wẹ sị ụnụ d'e kunrun ndị a gba ẹfa lẹ ndị a ma ozun lẹ ndị wẹ lẹ ndị-mmọn gba e mẹkọ, ndị a ka nwịnrịn-nwịnrịn, o furuni nị ndị alị jẹn d'a jụ Chuku wẹ ọnụ? Kị wẹ rị a jụnị ndị nwụnnị oku ndị rị ndụn?
20
Jẹn ni d'e kunrun Iwu Osolobuẹ lẹ ihiẹn ile ọ gwa ụnụ! Omẹni oku ịhịan gwa ụnụ lẹ Iwu Osolobuẹ a dangbamanị, ịya wụ nị ukpẹ arị imẹ wẹ.
21
Wẹ k'a rị imẹ afụnfụn lẹ ẹgụn, a wahunmẹ imẹ alịnị; ẹgụn gụnbe wẹ, e weshi wẹ ẹnya elu, kpọ eze wẹ lẹ Chuku wẹ iyi.
22
Wẹ lee ẹnya alị, a hụn wẹ nsọngbu lẹ ishi lẹ eje-ụya sụọ — a tụ wẹ wẹ ye imẹ ụya hụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes