Ago mami mesundeito eng’ emet ne kitinyei bichiindo. Eng’ betusiek che bo tai, ko kiipchi sasisiet emetab Sebulun ak emetab Naptali, ago kiitoror eng’ betusiek che bo let, oretab nyanjet, Jordan bitonin, Galili ne bo bororiosiek.
Amu kagisikwech lakwet, kagigonech werit; ak ting’e inendet bounatet tigikyiennyi: ak kiguure kainennyi Kwong’utiet, Kiruogindet, Kamuktaindet ne bo Kamuktaet, Kwanda ne bo Koigeny, Bounindetab Kalyet.
Mami ole igesunegei tesetab ge ne bo bounatennyi ak kalyet, eng’ ng’echeret ne bo laitornatetab Daudi, ak laitornatennyi, si kogimit, ak koboi eng’ kiruoget ak imanda koboch nguno agoi koigeny. Yaei nito kagiiletab ge ne bo Jehovah ne bo lugosiek.
Ing’eeti Suriek eng’ tai, ak Pilistik eng’ let; ak koam Israel eng’ kutit ne iseng’eng’at. Nganda u noto, ko ma istogei neregekyik, ago ta ko chuulat eunnyi kora.
Maboiboitu Jehovah eng’ murenikwak, ama rire chechuak che matinyei kwanda ak mosogikwak: amu ya age tugul, ak ko yaindetab yaitiet, ak komwaei kutit age tugul abusnatet. Nganda u noto, ko ma istogei neregekyik, ago ta ko chuulat eunnyi kora.