B goma ne-a yɛsa, Zɩɩda dĩma a Zoziyas biig a Zoakim wakato. N paas Zɩɩda dĩma a Zoziyas biig a Sedesiyas wakato. A Sedesiyas rɩɩ naam yʋʋm piig la a ye la kiis a nu. Kiuug a nu soaba pʋgẽ la b wʋk Zerizalɛɛm dãmb n kẽng yembdo.
«Mam da zoe n mii fo tiiri tɩ m nan pa yag foo f ma pʋgẽ ye. Mam da zoe n welga foo toore m tʋʋmd yĩnga tɩ f ma nan ka rog foom ye. M da yãk-f lame tɩ f yɩ m no-rɛɛsa bu-zẽmba tẽngẽ.»
Tɩ Soaala-Wẽnd leok-ma: «Da sak n yet tɩ fo yaa yãaga n paoodẽ ye. Ad foo n tog n kẽng mam sẽn na n tʋm foom neb niyns nengẽ, n wilg-ba m sẽn yet tɩ f wilg-b bũmb ning fãa.
Maam n yeele, mam na n boola goabg rãmba, b sagsa ne b rĩundã. B na n waame, n vigl b rĩm dãmba naam goeel Zerizalɛɛm dignoy wã. B na n gũbga a lalsã. B na n taka zabre ne Zɩɩda tẽnsa fãa.
Woto m na pids m sẽn kãab tẽnga rãmb bũmb ning fãa. La rẽ yaa b sẽn beeg-ma yĩnga; yaa b sẽn bas maam n tɩ kʋ maand wẽn-naands yĩnga. Yaa wẽnd dãmb b sẽn naane n na n waooge.
Aya, Zeremi! Bɩ f sẽbg f sɛɛga, yiki! Moon bũmb ning fãa m sẽn na n yeel tɩ f togs-ba. Da bas tɩ b yɛɛs-f ye, sã n ka rẽ maam n na n kɩt tɩ f rig rabeem bãmb taoore.
Dũnna menga m kõt-f-la pãnga wa tãnsoben-tẽng sẽn tar a soabã; m na n yals-f-la wa kut lalga, wa zũud ra-luka, tẽnga rãmb taoore, a Zɩɩda rĩm dãmba taoore, a kug-zĩidba, a maan-kʋʋdba, a nin-zaalsa fãa taoore.