ihiẹn ndị hụn m sị ndị nẹdi ụnụ kanị e mẹ kẹ m wepụha wẹ imẹ okẹn ọkụn hụ wụ alị Ijiptu.’ M sị wẹ, ‘Humẹni ni m isi, mẹsọnmẹ ihiẹn m sị ụnụ mẹ. Ụnụ mẹ wẹ, ụnụ a wụrụ ndị nke m, mmẹ nwẹn a wụrụ Chuku ụnụ.
Ogẹn hụ, e mẹzu m nkwa hụ m kun enwẹn m kwe ndị nẹdi ụnụ kanị, nị m jẹnkọ d'e ye wẹ alị rịgbu enwẹn ẹ mma mirin-ẹran lẹ mirin-ẹnwụn jun’ k'o dọn nwan rị tannị.” Ya kẹ m nọ sị Osolobuẹ, “Isẹẹ, Osolobuẹ!”
Ya kẹ Osolobuẹ nọ sị m, “D'a hị ihiẹnni imẹ obodo ndị rị alị Juda lẹ ọgbara-ogbe ile rị imẹ obodo Jerusalẹm, sị wẹ, ‘Gọn ni ntịn ihiẹn mmẹ lẹ ụnụ kwerigbama, ụnụ e gi ẹ e bi.
Gha ogẹn m gi gha alị Ijiptu wepụha ndị nẹdi ụnụ d'e ru tannị, ẹnịna kẹ m'a gba wẹ mkpịnsịn-ẹka ẹnya, a gba wẹ ya a gbakwasị, a sị wẹ, “Mẹ ni ihiẹn m sị ụnụ mẹ.”
Kanị, egọndẹni wẹ ntịn mọbụ gi ẹ dọn; e mẹsọnmẹ wẹ ihiẹn eje-obi wẹ gwa wẹ. Ya m nọ gi ọnụ-ẹsọn ile rị imẹ nkwerigbama ahụn m butọnị wẹ hụn wẹ dọnmẹlẹni sọn wẹ.’ ”
ẹghẹẹ, Juda e nwọngụọ mmọn buhan ọda kẹ obodo ndị rị imẹ Juda, kanị o yekọnị wẹ ẹka ụhụọhịn hụ; ụnụ ndị Juda e tumẹringụọ ukpo-mmọn bu ọda kẹ ọgbara-ogbe rị imẹ Jerusalẹm han, a nọ wẹ a mụye nsẹnsi a rụa ihiẹn ifẹnrẹn ahụn wụ Baalụ.’
Elee hụn Izrẹlụ m bu obi rịdẹ nwan imẹ ụlọ-nsọ m e mẹ hụnnị wẹ rị e mẹ eje-ihiẹnni ile? N'i gi anụ lẹ ịchụn ẹjan chụnpụ afụnfụn-njọ ị — bụ ị hụ e mẹ eje-ihiẹn y'e mẹ, a ghọghọ?”
Osolobuẹ ihiẹn ile rị okpuru ẹ, hụn kụnn'ị e kugụọ a nwan nị okẹn-ihiẹn k'e mẹ i, makẹni ụnụ ndị Izrẹlụ lẹ Juda e mẹgụọ eje-ihiẹn, kpasu m iwe yeni nsẹnsi ụnụ rị a mụyeni mmọn wụ Baalụ.
M te nọhụ kẹ nwa-atụnrụn mẹ jụụ wẹ dukọ d'e gbu. Amarịndẹ m nị e zugụọnị wẹ m umẹ, sị, “Nị ẹnyi gbutu ni osisini — okẹnnyẹni lẹ ihiẹn rị a gha a ọnụ a pụha; nị ẹnyi gbupụn'a elu-ụwa — anyanhankọzị wẹ ẹfan a.”
Kanị, Osolobuẹ ihiẹn ile rị okpuru ẹ, ịyụ hụn a han ezigbo eṅẹn, e lelezikwọ obi ịhịan lẹ iroro ẹ, nị m nwan gi ẹnya m hụn ebe ị nọ mẹgwarị wẹ, makẹni e bugụọ m oku m che i ẹka.