ne kiang’at kwanisiekwok eng’ betut ne kiamutu ichek komong’ eng’ emetab Misri, komong’une matab karnet, alenji, Ogas it kutinnyu, ak oyai choto, ko u tugul che ang’atok: si oegu bikyuk anyun, ak aegu Kamuktaindeng’wong’;
si kobiit agimit kayosiet ne kiayosiechi kwanisiekwok, ale agochini ichek emet ne nyiitat chego ak kumik, ko u rani. Awolu anyun, ale, Amen, ee Jehovah.
Ago ma kas it, ama eb it, ago kiwendot age tugul eng’ uuindab muguleldanyi ne ya: aipchini anyun ichek ng’alek tugul che bo kayomisoni, ne kigang’at ichek koyai, ago ma yai.
Kigoweekyigei tengekwogikab kwanisiekwak, che kiesio kogas ng’alekyuk; ak kiisub kanamonik koot: kigobut kayomisennyu gotab Israel ak gotab Juda ne kigayai koboto kwanisiekwak.
Yeityo koba nganasokab Juda ak bik che menyei Jerusalem, koba korirji kanamonik che igochin nyamdutik; ago masoru ichek agot kitigin eng’ betutab nyalildanywa.
Amu ko u ole te koitetab nganasoguk, ko u noto kanamoniguk, ee Juda; ak ko u ole te koitetab ortinwekab Jerusalem, ko u noto kiolumde kapkorosusiekab kit ne kililane, kapkorosusiek che kibeeljine Baal nyamdutik.
Kiguure Jehovah kaineng’ung’, Emdit ne tuon, ne kararan ak kotinyei logoek che miach: kiilaal mat eng’ yoto eng’ bolatetab wasetab ge ne o, ak kagoilyo temenikyik.
Amu kagomwa Jehovah ne bo lugosiek, ne kiminin, yaitiet agobo inye, amu yaitietab gotab Israel ak ne bo gotab Juda, che kigoyachigei kotacha anerech amu kiigochi Baal nyamdutik.
Ago kia u aruetab kechir ne tala, ne kikweriei kwo ole kieng’e; ak kima anai ale kigochob ichek chobutik che yaachen agobo ane, kole, Ongeng’em ketit koboto logoekyik, ak ongeiste inendet eng’ emetab che soptos, si mata kibwat kainennyi kogeny.
Ago, kona ageer yaaktaeng’ung’ bo mugetut eng’ ichek, ee Jehovah ne bo lugosiek, ne iruochi eng’ imanda, ne itieme kabwatutik ak muguleldo; amu kaang’ang’un ng’olyondennyu.